Բացել լրահոսը Փակել լրահոսը
A A
Հասարակություն

Շիրակում պարենային փաթեթ ստանալու համար դիմած ընտանիքների թիվը անցել է 400-ը

Գյումրիում մեկնարկել է «Սոցիալական շտապօգնություն» ծրագիրը։ Շիրակի մարզում եւս շատ են ընտանիքները, որոնք կորոնավիրուսով պայմանավորված  արտակարգ դրության պայմաններում զրկվել են բոլոր ֆինանսական աղբյուրներից։

«Սոցիալապես անապահով ընտանիքների համար պետական աջակցության ծրագիր մշակվել է ու շուտով կիրառության մեջ է դրվելու, սակայն հասկանալի է, որ շատերը հնարավորություն չեն ունենա ընդգրկվել  պետական աջակցության որևէ ծրագրում։ Իսկ մեր նախաձեռնության նպատակն է ձեռք մեկնել իրենց»,- նշում է ծրագրի հանրային կապերի պատասխանատու Գրիշա Հովսեփյանը։

Խնդրով մտահոգ գյումրեցիներն ուժերը միավորել են  ու նախաձեռնել «պարենային շտապօգնություն» ծրագիրը: Գաղափարին առաջինը հավանություն են տվել ու միացել Շիրակի մարզպետարանն ու «Գյումրին առանց տնակների» հիմնադրամը։

«Գաղափարի ամբողջ հիմքը մարդկանց փոխօգնության, փոխաջակցության և սոցիալական պատասխանատվությունն է ու այն ծնվեց այն ժամանակ, երբ շատ քաղաքացիներ մեզ դիմեցին, որ աշխատանք չկա ու զրկվել են իրենց ընտանիքի վերջին եկամտի աղբյուրից, ունեն աջակցության կարիք»,-ասում է Նախաձեռնության անդամ Կարեն Պետրոսյանը։

 Ծրագրի հանրային կապերի պատասխանատու Գրիշա Հովսեփյանը վստահեցնում է, որ յուրաքանչյուր ընտանիքի պատմություն մանրամասն ուսումնասիրվելու է:

Հնարավոր կեղծիքներից խուսափելու համար գործի  է դրվել սոցիալական երաշխավորի ինստիտուտը:

Միայն ընտանիքի անդամ ու  բարեկամ չհանդիսացող անձը կարող է դառնալ ընտանիքի երաշխավոր ու հաստատել տրամադրված տեղեկությունների հավաստիությունը։

«Շահառու ճանաչված ընտանիքներին տրամադրվելու է սոցիալական աջակցության պարենային զամբյուղ (ծանրոց), որը ներառում է մեկ շաբաթվա հաշվարկով պարենային ապրանքներ՝  4 հոգու համար նախատեսված յուրաքանչյուր ծանրոց 10-12 հազար դրամ արժեքով»,- նշում է պատասխանատուն։

Պարենային փաթեթ ստանալու համար նախաձեռնողներին դիմած ընտանիքների թիվն անցել է 400-ը:

Փաթեթն իր մեջ ներառում է` ալյուր, շաքարավազ, լավաշ,  բուսայուղ, մակարոն, ձու, մսի ու բանջարեղենի պահածոներ և այլ բազմաթիվ մթերքներ ու տնտեսական պարագաներ։

Այսօր արդեն 10-ը ընտանիքի ուղարկվել է պարենային փաթեթներ։

Այս օրերին նախաձեռնությանը միացել են բազմաթիվ կամավորներ, բարերարներ, մեծ ու փոքր խանութներ: Բոլոր նրանք, ովքեր ցանկություն կունենան օգնել այս ընտանիքներին, կարող են նվիրատվությունն անել http://donate4gyumri.am/ կայքում, ինչպես նաև ֆինանսական հանգանակություն անել հետևյալ հաշվեհամարներով՝

 

USD 1570025820780101

EUR 1570025820780147

AMD 1570025820780200

RUB 1570025820780158

Ստացող` «Գյումրին առանց տնակների հիմնադրամ»։

Իսկ կարիքավոր ընտանիքները ծրագրից օգտվելու համար կարող եք գրանցվել shtapognutyun.am կայքում կամ զանգահարել թեժ գիծ +374  94 03 20 42 կամ +374 99 20 22 30 հեռախոսահամարներով։