Հայուհին ամեն երեկո պատշգամբում երգում է ինքնամեկուսացած ֆրանսիացիների համար (տեսանյութ)

Լիոնի թաղամասերից մեկում   ամեն երեկո՝ ժամը 20-ին,  ծափերով բժիշկներին շնորհակալություն հայտնելուց  հետո, բնակիչները ներս չեն մտնում։ Արդեն գիտեն, որ  պատշգամբներից մեկից երգ է լսվելու, եւ ամեն օր՝ տարբեր։

Երգողը   23-ամյա Լուսինե Թադեւոսյանն է։

«Ամեն օր ծափերից հետո երգ եմ կատարում։ Երգերս նվիրում եմ բժիշկներին,  բուժաշխատողներին, ոստիկաններին, ինչպես նաեւ մեր քաջ զինվորներին, ովքեր պաշտպանում են սահմանը»,- «Ա1+»-ի հետ զրույցում ասում է նա։

Լուսինեն ծնունդով  Գյումրիից է։ 9 տարի առաջ է տեղափոխվել  Ֆրանսիա։   Ֆինանսների կառավարում է սովորում բուհերից մեկում․, իսկ երաժշտական կրթություն ստացել է Գյումրիի Շերամի անվան 5-րդ  երաժշտական դպրոցի վոկալ բաժնում։

«Ա1+»-ի հետ զրույցում Լուսինեն պատմում  է, թե  ինչ վիճակ է ներկայումս Ֆրանսիայում, որտեղ եւս արտակարգ դրություն է հայտարարված կորոնավիրուսային  հիվանդությամբ պայմանավորված։ Այսօրվա դրությամբ՝  Ֆրանսիայում 40174 մարդու մոտ է հայտնաբերվել այս հիվանդությունը։

Ըստ նրա՝  իրավիճակը օրեցօր դառնում է ճգնաժամային, հիվանդանոցներում  տեղերն արդեն չեն բավարարում։ Բայց հուսով է, որ շուտով ամեն ինչ կկարգավորվի։ Երգն էլ իրեն լավատեսություն է ներչնչում։ Ասում է՝ տարբեր առիթների ժամանակ, ֆրանսիացիների շրջապատում հայերեն է երգում։  Ուրախանում է՝  երբ  բառերը չհասկանալով,  ֆրանսիացիներն իրեն խնդրում են նորից երգել։