Պոեզիա՞, թե՞ արձակ․ երկու ցանկ՝ կորոնավիրուսային ընկճախտի դեմ
Աջակցիր «Ա1+»-ինԻնչ կարդալ տանը կորոնավիրուսի օրերին։ Ընթերցանությունը ,ըստ գրքասերների, այն լավագույնն է, որ կօգնի հաղթահարել ճգնաժամը։Բայց կարևոր է ընտրել այնպիսի գրականություն, որը կօգնի խուսափել լարվածությունից ու դրական լիցքեր կհաղորդի:
Գրքերի իրենց ցանկն են առաջարկում արձակագիրներ, «Միս ուտողները» և «Չաստվածաշունչ» գրքերի հեղինակ Հովիկ Աֆյանը և «Հիսուսի կատուն» գրքի հեղինակ Գրիգը: Ընտրված են այն գրքերը, որոնք հիմնականում առցանց հասանելի են:
Հովիկ Աֆյանը համոզված է, որ կարևորը ոչ թե ինչ կարդալն է, այլ առհասարակ կարդալը, հեղինակը վստահ է, որ ցանկացած, նույնիսկ, «չհաջողված» գիրք, ընթերցողին անպայման ինչ-որ բան տալիս է։
Մասնավորեցնելով, սակայն, նշում է՝ պոեզիան գրականության այն եզակի ժանրն է, որ կարող է մարդուն տեղափոխել մեկ այլ՝ ավելի լավ աշխարհ քան այն, որտեղ ինքը ապրում է՝ գոնե այս օրերին: Անցնելով արձակին՝ հեղինակը ընթերցողին խորհուրդ է տալիս ցանկում ավելացնել Սարոյան՝ որպես բացառիկ լավատես հայազգի գրող։
««Հայրիկ, դու խենթ ես»-ը հատկապես համավարակի այս ընթացքում հոյակապ ընտրություն կլինի»,-ասում է արձակագիրը։
Այս օրերին հարկադիր տանը մնալը շատերի համար նաև լավ առիթ է տանեցիների հետ ոչ հարկադիր շփման։ Իսկ որոշ գրքեր պարզապես ընդգծում են ընտանիքի ամրության կարևորությունը։ Նկատի ունենալով այս հանգամանքը՝ Հովիկ Աֆյանը խորհուրդ է տալիս ընթերցել Անրի Էռնոյի «Տեղը» վիպակը։
«Սա թեև հայ ընթերցող շրջանակներին հանրածանոթ ստեղծագործություն չէ, և կարող է թվալ տխուր սյուժեով, բայց մեծ խորհուրդ ունի: Այն մասին է, թե ինչ կարևոր դեր ունի ընտանիքը մեր կյանքում ու ինչքան կարևոր է, որ յուրաքանչյուրն այս կյանքում ունենա իր «Տեղը»»,- ասում է նա:
Հաջորդ գիրքը Ռեյ Բրեդբերիի «Խատուտիկի գինին» է. հեղինակի որակմամբ՝ սիրուն, քնքուշ ու դրական, այս օրերի must read-երից:
Ի՞նչ ցանկ է պատրաստել Գրիգը
«Նման օրերին մարդիկ բաժանվում են երկու խմբի: Նրանք, ովքեր ուզում են կտրվել իրականությունից և նրանք, ովքեր ուզում են կարդալ ավելի ծանր գրքեր՝ համոզվելու, որ իրենք միակը չեն»,- այս բաժանմամբ առաջնորդվելով՝ Գրիգը ընթերցողներին ներկայացնում է գրքերի իր ցանկը․
«Առաջին մասը նրանց համար է, ովքեր ցանկանում են այսօրվա իրականությունից փախչել՝ լուսավոր, բարի և հուսադրող:
- Յարոսլավ Հաշեկ՝ «Քաջարի զինվոր Շվեյկի արկածները». սա հատկապես նրանց համար է, ովքեր վստահ են, որ ամեն ինչ սարքած բան է․
- Վիլյամ Սարոյան ՝ «Հայրիկ, դու խենթ ես». Սարոյանը պարզապես շատ լուսավոր է․
- Դանիել Քիզ՝ «Ծաղիկներ Էլջերնոնի համար». կորոնավիրուսի մասին չեք էլ հիշի․
- Միգել դե Սերվանտես՝ «Դոն Կիխոտ». սա էլ դասականներից
Երկրորդ մասն ավելի ծանր է՝ նրանց համար է, ովքեր նախընտրում են մնալ իրականության մեջ:
- Ջորջ Օրուել – 1984
- Ռեյ Բրեդբըրի - 451 աստիճան ըստ Ֆարենհայթի
- Էնթոնի Բյորջես - Լարովի նարինջ
- Օլդոս Հաքսլի - Չքնաղ նոր աշխարհ» ։
Ի դեպ, այսօր պոեզիայի միջազգային օրն է։ 1999 թվականին ՅՈՒՆԵՍԿՕ-ի 30-րդ վեհաժողովում որոշում ընդունվեց մարտի 21-ը նշել որպես պոեզիայի միջազգային օր։
Որոշման մեջ, մասնավորապես, նշված է. «Պոեզիան կարող է պատասխան տալ ժամանակակից մարդու առջև ծառացած ամենասուր և խորքային հոգևոր խնդիրներին, սակայն դրա համար անհրաժեշտ է պոեզիայի վրա բևեռել հասարակության լայն շերտերի ուշադրությունը»:
