Արգելել մարդկանց կուտակումները․ ՀՅԴ Երեւանի Քաղաքային կոմիտեի հայտարարությունը

Հաշվի առնելով երկրում տարածվող վարակի վտանգը՝ հորդորում ենք առավել հետևողական լինել վարակի տարածումը կանխարգելող միջոցների կիրառման ուղղությամբ։ Բոլորին հորդորում ենք պահպանել հանգստություն և չմատնվել խուճապի։ Միևնույն ժամանակ Երևանի քաղաքային իշխանություններից պահանջում ենք ձեռնարկել բոլոր հնարավոր միջոցները՝ զերծ պահելու քաղաքը համաճարակի բռնկման ռիսկերից և առաջարկում ենք՝

- ժամ առաջ կազմավորել հակաճգնաժամային կառավարման կենտրոն,

- պոլիկլինիկաները ապահովել համապատասխան հանդերձանքով և պարագաներով,

- իրականացնել հանրային տրանսպորտի պարբերական ախտահանման աշխատանքներ (միջքաղաքային և այլն),

- հանձնարարել հանրային սպասարկման և առևտրային կենտրոնների տնօրինությանը  պարբերաբար իրականացնել ախտահանիչ միջոցառումներ, ժամանակավորապես դադարեցնել դրանցում գործող մանկական խաղասրահների գործունեությունը,

- հանձնարարել քաղաքային ոստիկանությանը՝ արգելել մարդկանց կուտակումները։

Հորդորում ենք քաղաքապետին՝ կոչով դիմել քաղաքացիներին և ցուցաբերել վճռականություն, քանի որ նման ճգնաժամային և արտակարգ իրավիճակներում է երևում իշխանությունների արհեստավարժությունը։ Անգործությունն ու անվճռականությունը կհանգեցնեն անկանխատեսելի հետևանքների։

Ինչպես ցանկացած արտակարգ իրավիճակներում, այնպես էլ հիմա ՀՅԴ Երևանի քաղաքային կոմիտեն հայտնում է կամավորներ տրամադրելու, ձևավորվելիք հակաճգնաժամային կառավարման կենտրոնի աշխատանքներին աջակցելու՝ իր պատրաստակամությունը։

Առոʼղջ եղեք:

ՀՅԴ ԵՐԵՎԱՆԻ ՔԱՂԱՔԱՅԻՆ ԿՈՄԻՏԵ