Պաշտոնյանների միջև խոսակցությունները չեն կարող ազդել Արցախի հետ հարաբերությունների վրա․ Արմեն Գրիգորյան
Աջակցիր «Ա1+»-ինԿառավարության նիստից հետո ՀՀ անվտանգության խորհրդի քարտուղար Արմեն Գրիգորյանը լրագրողների հետ ունեցած զրույցում անդրադարձավ լրագրողի հարցին, թե Արցախի անվտանգության խորհրդի նախկին քարտուղար Վիտալի Բալասանյանի հայտարարությունը որքանո՞վ է հանցակազմ պարունակում։
Գրիգորյանը նշեց, որ հարցը գտնվում է իրավապահ մարմինների տիրույթում։
«Կարծիք կա, որ երբ խոսակցություններ են լինում, դա կարող է ազդել պետությունների հարաբերությունների վրա, դա այդպես չի։ Պաշտոնյանների միջև խոսակցությունները չեն կարող ազդել Արցախի հետ հարաբերությունների վրա։ Երբևէ չի քննարկվում, որ իրենք հերոսական վարքագիծ են դրսևորել և մեծ ներդրումներ են ունեցել Արցախի պաշտպանության և հաղթանակի մեջ։ Ես էլ հեղափոխության մեջ եմ ներդրում ունեցել, արդյոք իրավունք ունե՞մ օրենքը խախտելու։ Ես պարտավոր եմ պատվելու Արցախի և հեղափոխության հաղթանակը և պատասխանատու դիրքորոշում ունենալ»։
Խոսելով Սիրիայում տեղի ունեցող իրադարձություններից՝ նա նշեց, որ Կառավարության դռնփակ նիստում հարցը քննարկվել է։
«Խնդիրը մեր ուշադրության կենտրում է, հանձնարարական կա որոշել, թե ինչպես պետք է Սիրիայում ապրող հայերի անվտանգությունն ապահովենք։ Պետք է հասկանանք նաև, թե ինչպիսի աջակցություն պետք է ցուցաբերենք։ Այս պահին հումանիտար խմբի աշխատանքներին հետ կապված լուրջ մարտահրավերներ չկան»,- ավելացրեց նա։
