Մանվել Գրիգորյանի առողջական վիճակն օրեցօր վատանում է․ փաստաբան (տեսանյութ)
Աջակցիր «Ա1+»-ինՄանվել Գրիգորյանի փաստաբան Լևոն Բաղդասարյանն այսօր լրագրողների հետ զրույցում ասաց, որ ԵԿՄ նախկին նախագահ, գեներալ-լեյտենանտ Մանվել Գրիգորյանի երկու առաջնային հիվանդություններին ավելացել են մի շարք երկրորդային հիվանդություններ։
Նա նշեց, որ իր պաշտպանյալի ոտքերն արդեն 70-80 տոկոսով չեն գործում, առողջական վիճակն օրեցօր վատանում է։ Բաղդասարյանի բնորոշմամբ՝ երկրում գործող փողոցային արդարադատությունը վտանգ է ներկայացնում թե՛ Մանվել Գրիգորյանի առողջությանը, թե՛ դատաքննության ընթացքին։
«Նախագահող դատավորը նույնպես ունի կաշկանդվածություն», - շեշտեց փաստաբանը։
Խոսելով Առողջապահության նախարար Արսեն Թորոսյանի հայտարարությունների մասին, թե Մանվել Գրիգորյանը նախարարության ուշադրության կենտրոնում է և կյանքին վտանգ չի սպառնում, Բաղդասարյանն ասաց, որ սա արդեն իսկ սուբյեկտիվ մոտեցում է ու ևս մեկ անգամ շեշտեց.
«Անթույլատրելի է այսպիսի հիվանդություններով մարդուն պահել կալանքի տակ պահելը»։
