Բացել լրահոսը Փակել լրահոսը
A A
Հասարակություն

Խնդիր ունենք անընդհատ կերտել նոր հերոսների․ Փաշինյանը մրցանակ հանձնեց (լուսանկարներ, լրացված) (տեսանյութ)

Գյումրու Սև բերդ ամրոցում «Մեր ժամանակի հերոսը» խորագրով մրցանակաբաշխությանը հանձնվեց 13 մրցանակ։

Վերջին՝ հատուկ մրցանակը հանձնեց վարչապետ Նիկոլ Փաշինյանը։

«Նոր Հայաստանի ամենակարևոր առանձնահատկությունը սա է, որ մենք խնդիր ունենք անընդհատ կերտել նոր հերոսների։ Ընդհանրապես՝ Հայասատանում եղել է այդ հարցը, թե ո՞վ է հերոսը ՀՀ-ում, ո՞վ է այն կերպարը, որին պետք է ձգտեն նմանվել երիտասարդները։ Այս հարցը սովորաբար մի պատասխան չի ունենում։ Աներկբա է, որ առաջին հերոսները մեր այն զինվորներն են, որոնք կանգնած են ահմանին»,- ընդգծեց Նիկոլ Փաշինյանը։

Մեր ժամանակների և բոլոր ժամանակների հերոսներ են նաև արվետագետները, գիտնականները, պետական և քաղաքական գործիչները։

«Նոր Հայաստանում՝ նոր Հայաստանի կերպարը ամբողջացնելու համար հարկավոր էր նաև հերոսական մեր այդ համայնքապատկերի ևս մի կարևոր շտրիխ ավելացնել, դա աշխատող և արարող մարդու կերպարն է։ Դրանք այն մարդիկ են, որոնք ունեն համարձակություն տնօրինել իրենց ճակատագիրը, դրանք այն մարդիկ են, որոնք ունեն պատասխանատվություն իրենց ձեռքը վերցնել իրենց և իրենց հայրենիքի ճակատագրի ղեկը, դրանք այն մարդիկ են, որոնք չեն սպասում որ որևէ մեկից ինչ-որ բան ստանան։ Դրանք այն մարդիկ են, որոնք պատրաստ են տալ, կիսվել իրենց տաղանդով, գիտելիքով կառուցելով իրենք իրենց ընտանքիի բարեկեցությունը»,- շեշտեց նա։

ՀՀ վարչապետ Նիկոլ Փաշինյանի ելույթը՝ ամբողջությամբ․

«Հայաստանի Հանրապետության մեծարգո նախագահ,

Արցախի Հանրապետության մեծարգո նախագահ,

Վեհափառ Տեր,

Ազգային ժողովի մեծարգո նախագահ,

Կառավարության հարգելի անդամներ,

Ազգային ժողովի պատգամավորներ,

Հյուրեր

 

Այսօրվա մրցանակաբաշխությունը և իրադարձությունը Հայաստանի և հայ ժողովրդի մասին են: Մենք այսօր հարգանքի և մեծարանքի տուրք ենք մատուցում մեր ժողովրդի տաղանդին, նրա ստեղծարար հզորությանը, սեփական ուժերին հավատալու նրա կարողությանը: Նոր Հայաստանի ամենակարևոր առանձնահատկությունը սա է, որ մենք խնդիր ունենք անընդհատ կերտել նոր հերոսներ: Ընդհանրապես Հայաստանում միշտ եղել է այդ հարցը, թե ով է հերոսը Հայաստանի Հանրապետությունում, ով է այն կերպարը, որին պետք է ձգտեն նմանվել երիտասարդները: Այս հարցը սովորաբար մի պատասխան չի ունենում:

 

Աներկբա է, որ առաջին և ամենամեծ հերոսները մեր այն զինվորներն են, ովքեր կանգնած են սահմանին և սպաները, մեր զինված ուժերը, մեր գեներալները: Երեկ Հանրապետության նախագահը կոչումներ և մեդալներ շնորհեց մեր բազմաթիվ զինվորականների: Աներկբա է, որ մեր ժամանկների և բոլոր ժամանակների հերոսներ են մեր ժողովրդի արվեստը և մշակույթը ստեղծած մարդիկ: Աներկբա է, որ բոլոր ժամանակների մեր հերոսներն են մեր գիտնականները, մեր բազմաթիվ պետական և քաղաքական գործիչները, բայց Նոր Հայաստանի կերպարն ամբողջացնելու համար հարկավոր է նաև հերսական այդ համայնապատկերի ևս մի կարևոր շտրիխ ավելացնել: Դա աշխատող և արարող մարդու կերպարն է: Դրանք այն մարդիկ են, ովքեր ունեն համարձակություն` տնօրինել իրենց ճակատագիրը: Դրանք այն մարդիկ են, ովքեր ունեն համարձակություն` իրենց ձեռքը վերցնել իրենց և իրենց հայրենիքի ճակատագրի ղեկը: Դրանք այն մարդիկ են, ովքեր չեն սպասում, որ որևէ մեկից որևէ բան ստանան, նրանք այն մարդիկ են, ովքեր պատրաստ են տալ, կիսվել իրենց տաղանդով, իրենց գիտելիքով, իրենց հմտություններով` կառուցելով իրենց ընտանիքի և ուրիշների բարեկեցությունը, հայրենիքի բարեկեցությունը: 

 

Մենք քաղաքական հեղափոխությունն սկսել, իրականացրել և նախապատրաստել ենք մի կարգախոսով` Հայաստանի Հանրապետության բոլոր քաղաքացիներին ասել ենք` Հայաստանի ապագան կախված է մեկ մարդուց, և այդ մեկ մարդը դու ես: Եվ մենք այսօր` տնտեսական հեղափոխության այս շրջանում, նույն ուղերձն ենք հղում ՀՀ բոլոր քաղաքացիներին, որ մեր երկրի բարեկեցությունը, մեր երկրի տնտեսական զարգացվածությունը, նաև մեր բանակի հզորությունը կախված է մեկ մարդուց, և այդ մեկ մարդը մեզնից յուրաքանչյուրն է, որովհետև պետք չէ մոռանալ, որ բանակն ամուր է իր թիկունքով, բանակն ամուր է իր տնտեսությամբ, բանակն ամուր է աշխատանքով, բանակն ամուր է բարեկեցիկ ժողովրդով: 

 

Մեր խնդիրն է, որ Հայաստանի Հանրապետությունը լինի բարեկեցիկ քաղաքացիների երկիր, և լինելու է բարեկեցիկ քաղաքացիների երկիր, որտեղ մարդիկ ունեն բավարար ինքնագնահատական, որտեղ մարդիկ բավարար չափով հավատում են իրենց ուժերին և մարդիկ սեփական ձեռքերով կառուցում են իրենց, իրենց ընտանիքների, իրենց միջավայրի և իրենց հայրենիքի բարեկեցիկ ներկան, և բարեկեցությունը բավարար է արդեն, որ լինի ապագա: Բարեկեցեթյունն արդեն պետք է լինի ներկա, և այս միջոցառումը հենց այդ բարեկեցիկ ներկայի մասին է, որը մենք ոչ թե կերտելու ենք, այլ մենք կերտում ենք և կերտում են մեր ժամանակների հերոսները: Ես ուզում եմ ասել, որ ամենադժվարը 45 հաղթոսղներից 13-ին ընտրելն էր, նրանք բոլորը հավասարաբար մեր ժամանակների հերոսներն են: 

 

Եվ, այո, մենք հարգանքի տուրք ենք տալիս յուրաքանչյուր աշխատող, յուրաքանչյուր ստեղծող մարդու, և ես անձամբ խոնարհվում եմ բոլոր այն մարդկանց առաջ, ովքեր գիտեն, որ Հայաստանի ապագան կախված է մեկ մարդուց, և այդ մեկ մարդը իրենք են, և իրենք պատրաստ են աշխատել և աշխատում են հանուն այդ ապագայի:

 

Հիմա ես կազդարարեմ մրցանակակրի անունը: Անկեղծ ասած, սա անվանել ենք գլխավոր մրցանակ և այդ գլխավոր մրցանակակիրը, իմ կարծիքով, հավաքական կերպարն է այդ բոլոր ժամանակների հերոսների: Նա մի մարդ է, ով իր կյանքում հեղափոխություն անելու որոշում է կայացրել` քաղաքից տեղափոխվել է գյուղ: Այստեղ կրկին այդպիսի մասնակիցներ ունեինք: Նա մի մարդ է, ով լինելով ընտանիքի մայր, չի համարել, որ ինքն անելիք չունի, որ ինքը չի կարող ձեռնարկատիրությամբ զբաղվել: Նա հավատացել է իր ուժերին, և ստեղծել է ձեռնարկություն: Այս մրցանակը նաև այն ընտանիքներին է պատկանում, այն ամուսիններին, այն որդիներին, ովքեր չեն սահմանափակում իրենց կանանց կամ մայրերի ինքնադրսևորվելու հնարավորությունը, և այս մրցանակը նաև մրցանակակրի ընտանիքին է պատկանում: Այս մրցանակը նաև խորհրդանշում է մեր ժողովրդի, մեր ազգի ստեղծարար հավաքական կերպարը, և այդ մրցանակակրի անունն է Ռիտա Մարտիրոսյան»:

 

Այնուհետև բեմ են բարձրացել «Մեր ժամանակի հերոսը» շարքի բոլոր մասնակիցները: Դիմելով նրանց` Նիկոլ Փաշինյանը նշել է. 

 

«Որպես ՀՀ վարչապետ` շնորհակալություն եմ հայտնում ձեր կատարած աշխատանքի համար, շնորհակալություն եմ հայտնում ձեզ, որ դուք հավատում եք ձեր ուժերին, ես ձեզ շնորհակալություն եմ հայտնում, որ դուք աշխատանքը համարում եք ձեր, մեր երկրի խնդիրների լուծման ճանապարհը: Այստեղ իհարկե, ոչ բոլորին, բայց շատերին ես հյուրընկալել եմ և տեսել եմ նրանց իրենց աշխատանքի մեջ, իրենց առօրյայի մեջ, և իսկապես այս մարդկանց գոյությունը Հայաստանի Հանրապետությունում ուզում եմ արձանագրել, որ մեծացնում է իմ վստտահությունը` որպես Հայաստանի Հանրապետության վարչապետ, որ մենք կլուծենք բոլոր այն խնդիրները, որ մեր առաջ դրված են:

 

Ընդհանրապաես Հայաստանի Հանրապետության տարբեր փուլերում երբեք լավատեսական կանխատեսումներ չեն եղել: Հոռետեսությունը եղել է Հայաստանի  հիմնական կանխատեսումը, բայց այս մարդկանց գոյությունն իմ խորին համզոմամբ, արձանագրում է մի երևույթ, մի փաստ: Իմիջիայլոց, նրանցից շատերը սկսել են աշխատել 2000, 2003, 2004, 2005 թվականից, վերջին 15 տարում, և այս մարդիկ իմ կարծիքով իրենց աշխատանքով կաթիլ առ կաթիլ կերտել են լավատեսության հաղթանակը Հայաստանի Հանրապետությունում: Եվ ես ձեզ շնորհակալություն եմ հայտնում հայ ժողովդրի շրջանում, Հայաստանի Հանրապետությունում լավատեսության հաղթանակի համար: Դուք հաղթել եք, դուք մեր ժամանակների հերոսներն եք»: