Տավուշի մարզպետը հանդիպում է Արճիսի բնակիչների հետ (տեսանյութ)
Աջակցիր «Ա1+»-ինՏավուշի մարզի Արճիս գյուղի բնակիչներն առավոտյան 8։30-ից փակել են Տավուշի մարզի մայրուղու գլխավոր հատվածը։
«Վանաձոր-Ալավերդի-Բագրատաշեն մայրուղու Արճիսի հատվածն ենք փակել»,- «Ա1+»-ի հետ զրույցում մանրամասնեց Արճիսի բնակիչ Արփինե Սարենց Միկիչյանը։
Նա ասաց, որ իրենց պահանջն ընդհանուր ջրի խնդրի լուծումն է։ «Մենք ցանկանում ենք այս հարցը դնել կառավարության առաջիկա նիստին»,- նշեց նա։
Միկիչյանի խոսքով՝ երկու ամիս առաջ էլ էին այս նույն խնդրով ճանապարհը փակել․ «Ասեցին՝ երեք ամսվա ընթացքում լուծում կտրվի, բայց երկու ամիս է անցել, ու դեռ արդյունք չունենք, աղբյուրները ցամաքած են»։
Նա նաև հավելեց, որ չափագրումներ, հաշվարկներ կատարվել են պատկան մարմինների կողմից, սակայն գործնական քայլեր, ըստ նրա, չեն կատարվել։
Այժմ արճիսցիներին հանդիպում է Տավուշի մարզպետ Հայկ Չոբանյանը։
Արփինե Սարենց Միկիչյանն իր ֆեյսբուքյան էջում Հայկ Չոբանյանի հետ հանդիպումից տեսանյութ է հրապարակել։
«Բոլորդ էլ հասկանում եք՝ 100 միլիոն դրամի ծրագիրը ոչ երեք օրվա ծրագիր է, ոչ էլ երեք շաբաթվա»։ Մարզպետն ասում է, որ համայնքապետի և ավագու հետ այլ լուծումներ կգտնեն՝ մինչև խնդրի ֆունդամենտալ լուծումը։ «Կառավարությունը հակված է ֆունդամենտալ լուծումների»,- ընդգծում է Չոբանյանը։
Նա նաև հավելեց՝ քանի որ Արճիսի համայնքապետարանը չի կարողացել լուծել այս խնդիրը, ինքը կլուծի ջրի հարցը։ Բնակիչներից մեկն արձագանքեց՝ ասելով, որ եթե չլուծվի, նորից ճանապարհը փակելու են։