Անգլիացի մասնագետները կընդօրինակեն հայկական փորձը (տեսանյութ)
Աջակցիր «Ա1+»-ինՏասներեքը, չնայած համարվում է, որ այնքան էլ հաջողակ թիվ չէ, սակայն Հայաստանի պետական սիմֆոնիկ նվագախմբի համար տասնեքերորդը արդյունավետ համերգաշրջան էր», -կեսկատակ ասում է նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը:
Հայաստանի սիմֆոնիկ նվագախումբն ամփոփեց այս տարվա համերգաշրջանը: 37 համերգային ծրագրեր, չկրկնվող երկացանկ, մոտ 44 հազար ունկնդիր, փառատոններ, բարեգործական և կրթական նախագծեր, հյուրախաղեր, մասնավորապես՝ Դուբայի օպերայի թատրոնում հինգ համերգ, որին ներկա է եղել 10000 հանդիսատես, 23 համերգի օնլայն հեռարձակում և միլիոնից ավելի դիտում, 16 երկրից 33 մենակատար: Անուններ, որոնց հետ ելույթը պատիվ է լավագույն նվագախմբերի համար:
Սերգեյ Սմբատյանը, կարևորելով նվագախմբի յուրաքանչյուր ծրագիր ու նախագիծ, առավել կարևորեց կրթական ծրագրերն ու ձայնագրությունները:
«Երևանի ավագ դպրոցների ավելի քան 14.000 աշակերտ դարձել է «Դաս Ա»-ի մասնակիցը: Նման կրթական ծրագրերը մոտիվացնում են նոր սերնդին դեպի դասական երաժշտություն, -ասում է նախագծի հեղինակ Սերգեյ Սմբատյանն ու հավելում, որ այն արձագանք է ստացել ոչ միայն Հայաստանում:
«Մեկ շաբաթ առաջ անգլիացի մասնագետներից, անդրադառնալով «Դաս Ա»-ին, կարծիք հայտնեցին, որ իրենց ուսումնական հաստատություններում ևս վատ չէր լինի նման կրթական ծրագրեր անցկացնել»:
Ինչ վերաբերում է 29 աուդիո և 28 վիդեո կատարած ու կատարվելիք ձայնագրություններին, պարոն Սմբատյանն ընդգծեց հայ կոմպոզիտորների ստեղծագործությունների ձայնագրությունների կարևորությունը: Խոսքը գնաց մասնավորապես Ջոն Տեր-Թադևոսյանի երկրորդ սիմֆոնիայի մասին, որ երբևէ չի ձայնագրվել, սակայն ժամանակին արժանացել է Շոստակովիչի առանձնակի գնահատականին: