Չպետք է վեթթինգը հասկանանք մորթել, ջարդել, փշրել. ԲԴԽ անդամի թեկնածու (տեսանյութ)
Աջակցիր «Ա1+»-ինԱժ-ում ԲԴԽ անդամի թեկնածու Գրիգոր Բեքմեզյանին հարց ուղղելով՝ «Իմ քայլը» խմբակցության պատգամավոր Լուսինե Բադալյանը հետաքրքրվեց, թե ինչպե՞ս է պատկերացնում վեթթինգի իրականացումը և այդ առումով անհանգստություններ ունի՞, թե՞ ոչ՝ հաշվի առնելով մամուլի հրապարակումները, թե վեթթինգը կաթվածահար կարող է անել պետության արդարադատական համակարգը:
Գրիգոր Բեքմեզյանը նշեց, որ այդ առումով որոշ անհանգստություններ ունի, սակայն վստահ է, որ ամեն ինչ անցնելու է շատ հարթ, քանի որ կա կամք և ցանկություն:
«Ես ինտերնետում փորձեցի գտնել, թե վեթթինգը ինչ է, հավատացեք՝ ոչ մի նորմալ բան չեմ տեսել։ Միայն Արգետինայի օրինակը գտա, որը հաջողությամբ էր ավարտվել: Իմ կարծիքով՝ կարևոր է, թե պետությունը ինչ հիմք և գործիքակազմ կդնի վեթթինգի հիմքում:Մեզ պետք չի կառչել տերմինից, ես դա կկոչեմ դատական համակարգի առողջացում»:
Թեկնածուն ավելացրեց, որ վեթթինգը չպետք է նպատակ ունենա մաքրել դատական համակարգը դատավորներից , այսինքն՝ ստիպել դատավորներին հրաժարական տալ,այլ առաջնային նպատակը պետք է լինի թոթափել կոռուպցիոն երևույթները. «Չպետք է վեթթինգը հասկանանք մորթել, ջարդել, փշրել»:
Պատգամավորը հետաքրքրվեց նաև՝ քանի որ վեթթինգը մասնագիտական արդարության ստուգման գործընթաց է ներկայացնում, և եթե ստուգման ընթացում պարզվի, որ մի շարք դատավորներ արդար չեն գործել, կարո՞ղ են բացել այդ գործերը, թե դա երկար ժամանակ կպահանջի:
Գրիգոր Բեքմեզյանը պատասխանեց, որ ցավալի հարց է հասարակության շրջանում, քանի հասարակության 90 տոկոսը գտնում է, որ իր հանդեպ կայացվել է ոչ արդար դատական ակտ, և այն պետք է վերաբացվի:
«Եթե դատական գործերը բացվեն ու նոր քննություններ իրականացվեն, դրա տակից ուղղակի դուրս չենք գա, քանի որ այն շատ ծանր բեռ է, քանի որ եղած դատական գործերի հետ մեկտեղ՝ մենք պետք է քննենք տարիների ընթացքում կայացված դատական գործերից մեծ մասը։ Սակայն շատ գործերի դեպքում ապացույցներ չեն պահպանվել»,- ասաց նա:
