Նազենի Ղարիբյանը և ազգային կինոկենտրոնը ուղղորդված պայքար էին տանում իմ դեմ. կինոռեժիսոր (տեսանյութ)
Աջակցիր «Ա1+»-ինԿինոռեժիսոր Հովհաննես Գալստյանի և Ազգային կինոկենտրոնի ղեկավարության հարաբերությունները շարունակում են լարված մնալ: Հովհաննես Գալստյանը պնդում է, որ Ազգային կինոկենտրոնը դատերը ձգելու քաղաքականություն է որդեգրել: Կինոռեժիսորը չի նահանջելու, պատրաստ է դիմել մինչև երկրի առաջին դեմքին:
«Մոտ օրերս պատրաստվում եմ բաց նամակով դիմել Նիկոլ Փաշինյանին և Կրթության, գիտության, մշակույթի և սպորտի նախարար Արայիկ Հարությունյանին, որպեսզի իրենք զսպեն Ազգային կինոկենտրոնի տոտալ շանտաժի քաղաքականությունը, դատախազությանը անընդհատ նամակներ գրելու քաղաքականությունը»,- «Ա1+»-ի հետ զրույցում ասաց նա:
Կինոռեժիսորը Ազգային կինոկենտրոնի գործողություններում միտում է նկատում:
«Հայաստանի ազգային կինոկենտրոնի ներկայիս ղեկավարությունը և արդեն ոլորտին հրաժեշտ տված Նազենի Ղարիբյանը իր հիմնած Ֆիլմերի ֆինանսավորման պետական հանձնաժողովի մոտ 20 հոգով ուղղորդված պայքար էին տանում իմ կինոընկերության՝ «Պարալլելս ֆիլմ»-ի դեմ»:
Հիշեցնենք, որ Ազգային կինոկենտրոնը Հովհաննես Գալստյանի «Տատիկիս վարսերը» ֆիլմի արտադրության ֆինանսավորումը կասեցրել էր:
Հովհաննես Գալստյանը այսօր Ազգային ժողովում մասնակցում էր կինոյի ոլորտում օրենսդրական հնարավոր լուծումների վերաբերյալ լսումերին: Մենք կինոռեժիսորից հետաքրքրվեցինք նաև այդ ոլորտում անհրաժեշտ փոփոխություններից: Հովհաննես Գալստյանի խոսքով՝ կինոյի մասին օրենք ընդունելը երկրորդական է, առաջնայինը կառուցվածքի փոփոխությունն է:
«Մենք առաջարկում ենք փոխել կինոյի պետական կառավարման մոդելը, դա աշխատի մեկ տարի, տեսնենք թերությունները ու շտկենք, հետո օրենքի ուժ տանք այդ ամենին»,- ասաց նա:
Մանրամասները՝ տեսանյութում: