Էլեկտրոնային գլանակներն իրականում այլընտրանք չեն ծխախոտին, պարունակում են նույն խտանյութը. մասնագետ
Աջակցիր «Ա1+»-ինԾխախոտի դեմ պայքարի միջազգային օրվա առթիվ Առողջապահության նախարարությունը թեմայի հետ կապված հանդիպում էր կազմակերպել ոլորտի փորձագետների և բժիշկների հետ: Քննարկման հիմնական թեման էր «Ծխախոտը և թոքերի առողջությունը»: Այն միտված էր բարձրացնելու հասարակության իրազեկվածությունը ծխելու հնարավոր վտանգների մասին:
Ծխելը համարվում է հիվանդություն, սակայն այդպես չի ընկալվում: Բանախոս Արուս Հարությունյանը դա պայմանավորում է հասարակության մոտեցմամբ. Ըստ նրա՝ պետք է զարգացնել գիտակցական շերտը և աստիճանաբար հասնել դրա լուծումներին:
«Օրինակ՝ եթե 100 մարդ որոշում է թողնել ծխելը, ապա 1 տարի անց միայն 5 մարդ է հաջողում այդ գործում: Կարևորը չհանձնվելն ու կրկին փորձելն է»,-ասում է փորձագետ Արուս Հարությունյանը:
Ծխախոտը հոգեբանական և կենսաբանական կախվածություն է առաջացնում, այստեղ կարևոր է բժիշկների և հոգեբանների դերը: Անհրաժեշտ խորհրդատվության դեպքում հնարավոր է հրաժարվել ծխախոտ օգտագործելուց:
Վերջերս «Սոֆարմա» դեղատների ցանցը Հայաստան է ներմուծել դեղամիջոց, որը, ըստ բժիշկ Ալեքսանդր Բազարչյանի, հաջորդ օգնող միջոցն է, որի փոխարեն շատերը նախընտրում են օգտագործել էլեկտրոնային գլանակներ:
«Ծխախոտին այլընտրանք առաջարկվող էլեկտրոնային գլանակներն իրականում այլընտրանք չեն, քանի որ դրանք պարունակում են նույն խտանյութը: Դրանց պատրաստման ձևերն են ուրիշ, բայց վնասակարությունը, այնուամենայնիվ, կա»,- ասում է Ալ. Բազարչյանը:
Փորձագետները կողմ են առողջապահության նախարարության առաջարկած փոփոխություններին, և իրենք էլ են պատրաստվում առաջարկություններով հանդես գալ: Թեև ծրագիրը քննարկման փուլում է, նրանք վստահ են, որ այն դրական արդյունքներ է տալու:
Ծխախոտի կանխարգելմանն ուղղված ծրագրեր են մշակվում նաև կրթական հաստատություններում կիրառելու նպատակով: Համաշխարհային ուսումնասիրությունների համաձայն՝ ծխախոտ օգտագործելու սովորույթը սկսվում է դպրոցական տարիներից. դեռահասության շրջանում տղաներն սկսում են ծխել ինքնահաստատվելու համար, բայց որոշ ժամանակ անց, երբ ցանկանում են թողնել, չի ստացվում՝ ուժեղ կախվածության պատճառով: Ծրագրերը դեռ քննարկման փուլում են, որոնց վրա աշխատում են բժիշկները, հոգեբաններն ու փորձագետները:
