«Պատգամավորի կարգավիճակը օգտագործեց և տեսադաշտից կորավ».Նիկոլ Փաշինյան (տեսանյութ)
Ինչո՞ւ նախկին պատգամավոր, Բնապահպանության նախկին նախարար Արամ Հարությունյանը, որը մեղադրվում է առանձնապես խոշոր չափերով կաշառք ստանալու և փողերի լվացման համար, դեռ չի կալանավորվել. վարչապետ Նիկոլ Փաշինյանից հետաքրքրվում է լրագրողը:
«Որովհետև պատգամավորի կարգավիճակը օգտագործեց և տեսադաշտից կորավ, քանի դեռ պատգամավորական անձեռնմխելիությունից նա զրկված չէր, որևէ մեկը նրա նկատմամբ լծակ չուներ»,-ասաց նա։
Իսկ ԴԱՀԿ նախկին պետ Միհրան Պողոսյա՞նը, որը մեղադրվում է առանձնապես խոշոր չափերով գույք յուրացնելու կամ վատնելու և պաշտոնեական լիազորությունները չարաշահելու մեջ:
«Միհրան Պողոսյանը նույնպես պատգամավորական անձեռնմխելիությունից օգտվելով դուրս է եկել ՀՀ-ից, ի՞նչ կա այդտեղ զարմանալու: Եթե նրանց պատգամավորական անձեռնմխելիության պայմաններում ձերբակալեին, բոլորդ պիտի ասեիք՝ բա ո՞ւր մնաց օրենքը: Բայց ո՞ւր պիտի փախնեն, երկրագունդը փոքր է»,- դիմելով լրագրողներին ասաց վաչապետը:
Լրագրողների հաջորդ ինչուն՝ վերաբերում էր ՀՀ երրորդ նախագահ Սերժ Սարգսյանի եղբորորդուն՝ Նարեկ Սարգսյանին, որը հայտնաբերվել է Չեխիայում եւ նախկին Պաշտպանության նախարար Միքայել Հարությունյանին, որն էլ Ռուսաստանում է: Վարչապետը նկատեց՝ Միքայել Հարությունյանը ՌԴ քաղաքացի է և պետք է այս իրավիճակի հետ հաշվի նստենք: Վարչապետը մի օրինակ բերեց.
«Հայաստանում կա հանցագործ մեկը, որը օտար երկրի կողմից հետախուզվում է, և ակնկալում է, որ մենք հանձնենք, բայց այդ մարդուն մենք չենք կարող հանձնել միայն այն բանի բերումով, որ ինքը ունի ՀՀ անձնագիր: Հիմա, մեզ Չեխիան մեղադրի, որ մենք իրենց անվտագությանը սպառնալիք ենք ստեղծում»:
Վարչապետի այս հայտարարությանը անդրադարձել է նաև «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը: Նա իր ֆեյսբուքյան էջում գրել է, որ վարչապետի կողմից հիշատակված հանցագործ մեկը՝ Չեխիայի կողմից պահանջվող ու Հայաստանում գտնվող «Զապ» մականվամբ հայտնի «օրենքով գող» Անդրանիկ Սողոյանն է:
«Չեխիայում 22 տարվա ազատազրկման դատապատրված Սողոյանին քրեական պատասխանատվության կանչման համար կա երկու ճանապարհ՝
Ա) Չեխիայի հետ սեփական քաղաքացուն արտահանձնման միջպետական պայմանագիր կնքել,
Բ) Ստանալ գործի նյութերը և Հայաստանում քննել այդ գործը:
Առաջին սցենարը իրատեսական չի, երկրորդ սցենարին, որքան հասկանում եմ, դեմ է չեխական կողմը: Ըստ այդ, հավանաբար, Զապը դեռևս երկար է մնալու Հայաստանում ու ազատության մեջ»,- գրել է Իոաննիսյանը: