«Եթե Հայաստանում հաջողություն չունեցանք, կդիմենք միջազգային ատյաններ». Կարեն Տոնոյան (տեսանյութ)
Թվում էր, թե հետհեղափոխական շրջանում «Էլեկտրիկ Երևանի» իրադարձությունների ընթացքում լրագրողների աշխատանքի խոչընդոտման և նրանց հանդեպ բռնություն իրականացրած անձինք պատասխանատվության կենթարկվեն, բայց ինչպես տեսնում ենք Հատուկ քննչական ծառայությունը հետհեղափոխական շրջանում առավել անարդյունավետ է աշխատում: Այս մասին հայտարարեց Խոսքի ազատության և պաշտպանության կոմիտեի (ԽԱՊԿ) նախագահ Աշոտ Մելիքյանը՝ անդրադառնալով Էլեկտրիկ Երևանի մասով ՀՔԾ-ի կասեցման վերաբերյալ որոշմանը: 2015 թվականի հունիսի 23-ի իրադարձություններից հետո, երբ քրեական գործ հարուցվեց, 21 տուժած լրագրողներից 3-ը դիմեցին ԽԱՊԿ՝ իրենց իրավունքների պաշտպանության համար: ԽԱՊԿ-ն հարցումներ ուղարկեց ՀՔԾ՝ հասկանալու, թե ինչ ընթացք է ստանում գործը: Սակայն Էլեկտրիկ Երևանի իրադարձություններից հետո հարուցված քրեական գործով միայն մեկ քննիչ էր աշխատում, ընդ որում գործընթացը ձևական բնույթ էր կրում: Խոսքի ազատության և պաշտպանության կոմիտեն բարձրաձայնեց այս մասին: Արդյունքում բողոքը հասավ գլխավոր դատախազին, որից հետո քննչական խումբ կազմվեց գործի քննությունն առավել հետևողականորեն քննելու համար: Սակայն նույնիսկ այդ դեպքում նախաքննությունը լուրջ ընթացք չունեցավ: Ի վերջո` բողոքով դիմեցին միջազգային ատյաններ: Երկու լրագրողների գործն ուղարկվեց ՄԱԿ-ի իրավունքների կոմիտե, մեկինը ՝ Եվրոպական դատարան: Սակայն միջազգային ատյաններից տեղեկացրին, որ հարկավոր է նախ երկրի ներսում անցնել բոլոր երեք դատարանի ատյաններով, որից հետո, եթե հարցը լուծում չստանա, նոր կարող են դիմել միջազգային ատյաններ: Սակայն տեսնելով, որ նախաքննությունն անարդյունավետ ընթացք է ստանում, 2016-2017 թթ-ի խոսքի ազատության և պաշտպանության կոմիտեն դիմեց միջազգային ատյանների, գործը շարունակելով ՄԱԿ-ի մարդու իրավունքների դատարանում: Աշոտ Մելիքյանի խոսքով այդ նույն գործը ՀՔԾ-ի կողմից, ի վերջո լուծում չստանալով հանգեցրեց կասեցման որոշման. «Ես չեմ կարծում, որ լրագրողական հանրությունը կարող է հանդուրժել սա, այն պարզ պատճառով, որ շատ լրագրողներ այդ իրադարձությունների ընթացքում ապօրինի բերման են ենթարկվել»- ասաց Աշոտ Մելիքյանը: Մանրամասն՝ տեսանյութում
