12-ամյա ֆուտբոլիստը` մեծահասակների մրցապայքարում
Աջակցիր «Ա1+»-ինԲոլիվիայի 2009 թ Կլաուսուրայի առաջնության 1-ին տուրի «Ավրորա» - «Լա Պաս» խաղին իր նորամուտը նշեց 12-ամյա ֆուտբոլիստ Մաուրիցիո Բալդիվիեսոն` մասնակցելով խաղի վերջին 9 րոպեներին:
Այդպիսով, նա դարձավ Հարավային Ամերիկայի ամենակրտսեր խաղացողը, ով մասնակցեց մեծահասակների մասնակցությամբ հանդիպմանը: Մինչ այդ ռեկորդը պատկանում էր Պերուի ներկայացուցիչ Ֆերնանդո Գարսիային, ով վարպետների թիմում առաջին անգամ հանդես էր եկել 14 տարեկան հասակում:
12-ամյա ֆուտբոլիստի նորամուտը կարող էր տխուր ավարտ ունենալ, քանի որ խաղադաշտ մտնելուց 5 րոպե անց նա «Լա Պասի» պաշտպան Անրի Ալակի հետ մենամարտի ժամանակ թեթեւակի վնասեց ոտնաթաթը, սակայն բժշկական օգնություն ստանալուց հետո, հանդիսականների ծափերի ներքո շարունակեց խաղը:
Այդ միջադեպի կապակցությամբ հյուրերի մարզիչը հայտարարեց, որ ֆուտբոլը տղամարդկային խաղ է, եւ որ կոշտ պայքարը դրա բաղկացուցիչ մասն է: «Ավրորայի» գլխավոր մարզիչ Խուլիո Ցեզար Բալդիվիեսոն, ով Մաուրիցիոյի հայրն է, ասաց, որ շատ հպարտ է իր որդու նորամուտով ու խաղով, եւ խստորեն քննադատեց հանդիպման մրցավարին, ով դաշտից հեռացրեց «Լա Պասի» երկու ֆուտբոլիստների, սակայն չպատժեց որդուն վնասվածք հասցրած ֆուտբոլիստին:
