Գյումրիում հայ կնոջ սպանությունը չպետք է քաղաքականացնել. Ս. Կոպիրկին
«Այնպիսի տպավորություն է, որ մեր զինվորականներն իրար հետեւից հանցագործություն են կատարում եւ ամեն անգամ մենք այդ խնդրի հետ առնչվում ենք: Ես իրավասու չեմ մեկնաբանություն անել Գյումրիում տեղի ունեցած դեպքի վերաբերյալ»,- այսօր լրագրողների հետ հանդիպմանն ասաց ՀՀ-ում Ռուսաստանի արտակարգ եւ լիազոր դեսպան Սերգեյ Կոպիրկինը: Դեսպանի խոսքով՝ չպետք է քաղաքականացնել այդ հարցը: «Դա քննություն իրականացնող մարմնի եւ ռուսական ռազմաբազայի փոխհամագործակցության հարց է: Իմ տվյալներով շատ սերտորեն է իրականացվում այդ համագործակցությունը: Քննության հիմքում հայկական օրենսդրությունն է եւ այն փաստաթղթերը, որոնցով կանոնակարգվում է ռազմաբազայի գործունեությունը Գյումրիում: Այդ հանցագործությունը պետք է ուսումնասիրվի եւ մեղավորը պետք է պատասխանատվություն կրի»,-ասաց դեսպանը: Հիշեցնենք, որ դեկտեմբերի 3-ին Գյումրու Սլաբոդկա թաղամասում ռուսական 102-րդ ռազմաբազայի զինծառայողը դաժան ծեծի է ենթարկել Գյումրու քաղաքապետարանում որպես փողոցի հավաքարար աշխատող կնոջը: Վերջինս մահացել է հիվանդանոց տեղափոխելու ճանապարհին:
