Ընդամենը մեկ բաժակ սուրճի գին՝ հռոմեական բարոկկո բարձրարվեստ կտավներ տեսնելու համար
Մշակույթը, արվեստը, ասես, կեռաս լինի, և մեկը ուտելուց հետո ձեռքդ երկրորդին ես պարզում և հետո շարունակ ուզում ես ուտել, այնպես էլ սա նման նախաձեռնությունների, ծրագրերի շարունակական սկիզբ կարելի է համարել: Դեկտեմբերի 5-ին Հայաստանի ազգային պատկերասրահում կբացվի «Բեռնինիի դպրոց. հռոմեական բարոկկո» ցուցահանդեսը: Կներկայացվեն Իտալիայի Արիչչա քաղաքի Պալացցո Կիջիի թանգարանում պահվող բարոկկո ոճի 55 բարձրարվեստ կտավներ: Նախաձեռնողները և կազմակերպիչներն են՝ ՀՀ-ում Իտալիայի դեսպանությունը, ՀՀ Մշակույթի նախարարությունը և Հայաստանի ազգային պատկերասրահը: Գալիք ցուցահանդեսի բացման առթիվ կազմակերպվել էր «պրեսս լանչ», որի բանախոսներն էին՝ ՀՀ-ում Իտալիայի արտակարգ և լիազոր դեսպան Ն.Գ. պարոն Վինչենցո Դել Մոնակոն , ՀՀ Մշակույթի նախարարի տեղակալ Տիգրան Գալստյանը և Հայաստանի ազգային պատկերասրահի տնօրեն Արման Ծատուրյանը: «Ես սիրում եմ նման անբռնազբոս ֆորմատներ, երբ ավելի մտերմիկ և ջերմ զրույց կարող է ստացվել»,- ասաց պատկերասրահի տնօրենը: Տիգրան Գալստյանի խոսքով, կարճ ժամանակահատված էր նման ցուցահանդես կազմակերպելու համար, և ոլորտի մասնագետները սա կարող են փաստել: Նման ցուցադրությունների իրականացման համար տարիներ, այլ ոչ ամիսներ են հարկավոր: «Քանի որ այս կտավները շատ դժվար են դուրս գալիս երկրից և նաև ծախսատար են, մենք օգտվեցինք առիթից, որ նրանք բերվել էին Վրաստան և մինիմալ ծախսերով կարողացանք բերել Հայաստան», -ասաց նախարարի տեղակալը: - Հռոմեական բարոկկոյի նման քանակի գործեր Հայաստանում առաջին անգամ են ներկայացվելու, սակայն չեմ ցանկանա, որ սա ռեկորդային թիվ համարվի և թող սա լինի առաջին գրանցված հաջողությունը: Ի պատասխան մենք կաշխատենք նաև, որ մեր գեղարվեստի արժեքները նույնպես ներկայացվեն Իտալիայում, մասնավորապես Հռոմում: Մեր երկրները դարերով մշակութային սերտ կապեր են ունեցել և այս ցուցահանդեսը ևս թող այդ փաստի ամրագրումը լինի: Մշակույթի նախարարի տեղակալի խոսքով, Բորգեսի այգում կտեղադրվի Հովհաննես Թումանյանի արձանը և հիմա այդ ուղղությամբ արդեն աշխատանքներ են տարվում: Սա բարձրարժեք քանդակ պետք է լինի, քանի որ տեղադրվելու է աշխարհի կարևորագույն քանդակների այգում: Բաց մրցույթ կհայտարարվի, երբ հասկանան, թե ինչ գումար կարող են հատկացնել և կընտրվի լավագույնը, վստահեցրեց նախարարի տեղակալը: Հայաստանի ազգային պատկերասրահի տնօրեն Արման Ծատուրյանը հուսով է, որ ցուցահանդեսը մարդաշատ կլինի: «Վստահ եմ,-ասաց նա,- որ պետությունը պետք է մշակույթի պահպանման գործում մեծ դերակատարում ունենա, սակայն թանգարան պահելու ողջ բեռը պետության ուսերին չպետք է լինի և հետաքրքիր ծրագրերով, աննախադեպ ցուցահանդեսներով մենք պետք է կարողանանք գումարներ բերել և հոգալ մեր խնդիրները, լավացնել մեր աշխատողների, գիտաշխատողների կենսապայմանները: Նրա խոսքով, Այվազովսկու ցուցահանդեսի աննախադեպ հաջողությունը կանխորոշեց նաև մեծանուն ծովանկարչի հայկական ծագման առկայությունը: «Հայերը սիրում են հպարտանալ նման անուններով և ինչպես Սպիվակովի համերգի տոմսերը, որպես «հայ փեսայի» երկրորդ օրն, իսկ ամբողջությամբ վաճառվում են, այնպես էլ Այվազովսկու ցուցահանդեսի հաջողությունը պայմանավորում եմ այս հանգամանքով ևս: Հուսով եմ, որ այս նախադեպը չունեցող ցուցահանդեսը, չնայած հայի անվան հետ կապված չէ, կարծում եմ կկրկնի Այվազովսկու ցուցահանդեսի հաջողությունը և նույնքան մարդաշատ կլինի, և չնայած այնքան էլ ակտիվ տուրիստական սեզոն չէ, զբոսաշրջիկներ շատ կունենանք: Սա եզակի ցուցադրություն է և նման առիթ արվեստասերները համոզված եմ բաց չեն թողնի,- ասաց պատկերասրահի տնօրենը, իսկ մշակույթի նախարարի տեղակալը հավելեց, որ ընդամենը մեկ բաժակ սուրճի գին՝ 1500 դրամ են վճարելու նման բարձրարժեք կտավներ տեսնելու համար: Արման Ծատուրյանն էլ իր հերթին հույս հայտնեց, որ մշակույթի նախարարությունը ֆինանսապես կօժանդակի ոչ միայն համերգային ծրագրերը, այլ նաև նման ցուցահանդեսները: «Քրիստոնեությունն է, որ միավորում է հայ և իտալական համայնքները և քանի որ պարզ պատկերներով իտալացի մեծ նկարիչները կարողացել են արտահայտել հենց քրիստոնեության փիլիսոփայությունն ու գաղափարները և կարծում եմ հայերի համար այս հանգամանքը ևս կարևոր է», նշեց ՀՀ-ում Իտալիայի արտակարգ և լիազոր դեսպան Ն.Գ. պարոն Վինչենցո Դել Մոնակոն: Նա իր շնորհակալական խոսքն ուղղեց Հայաստանի կառավարությանը և մշակույթի նախարարությանը, որոնք դեսպանի խոսքով, իր այս նախաձեռնության համար դռները ոչ միայն բացեցին, այլ լայն բացեցին և իրոք շատ կարճ ժամանակում կարողացան ահռելի գործընթաց իրականացնել: «Այս ցուցահանդեսը շատ նշանակալի է նաև որպես տարվա կտրվածքով հայ-իտալական մշակութային, տնտեսական և քաղաքական սերտ համագործակցության լավագույն ամփոփում է», -ասաց նա: Իրականում սա եվրոպական նախագիծ է, եվրոպական մշակութային ժառանգության տարվա շրջանակում է իրականացվում և նախագծի իրականացման համար իր աջակցությունն է ունեցել նաև եվրամիության պատվիրակությունը: Մշակույթը, արվեստը, ասես, կեռաս լինի, և մեկը ուտելուց հետո ձեռքդ երկրորդին ես պարզում և հետո շարունակ ուզում ես ուտել, այնպես էլ սա նման նախաձեռնությունների, ծրագրերի շարունակական սկիզբ կարելի է համարել: Երբ ինձ Հայաստանում դեսպան էին նշանակում, ասում էին, որ մշակույթը այն սյուներից է, որ դու պետք է հիմնվես քո աշխատանքը կատարելու և էլ ավելի ամրացնելու հայ-իտալական հարաբերությունները: Մայիսից մինչ օրս սա տասներեքերորդ մշակութային ծրագիրն է, որ իրականացնում է դեսպանությունը և ես շատ ուրախ կլինեմ, որ կարողանամ հնարավորինս օգնել Հայաստանի կառավարությանը Հռոմում փոխադարձ ցուցահանդես կազմակերպել: Մշակույթը անխոս նպաստում է քաղաքական, տնտեսական ոլորտների զարգացմանը, սակայն, որ առավել կարևոր է բերում է փոխադարձ ծանոթություն: Երբ ակնկալում ենք, թե որքան այցելու կարող է ունենալ ցուցահանդեսը կարող ենք երկու ձևով հաշվարկ կատարել: Առաջինն այն թիվն է, օրինակ 25000, որ կգրանցվի, սակայն մեկ այլ մոտեցում ևս կա, որով ես եմ միշտ ուղղորդվում: Օրինակ, հազար այցելուն, սոսկ կլոր թիվ չէ, դա մեկ, մեկ, մեկ և այսպես շարունակ մարդիկ են, որ կազմում են այդ կլոր թվերը»: Ծրագրեր և նախաձեռնություններ պարոն Վինչենցո Դել Մոնակոն շատ ունի, սակայն ամենն իր հերթին,-ասաց նա: «Երբ ես այցելեցի մարտին շիկահեր էի և կապտաչյա և տեսեք, թե ինչպիսին եմ այժմ», - իր խոսքի ավարտին կատակեց դեսպանը: Ի դեպ, «Բեռնինիի դպրոց. հռոմեական բարոկկո» ցուցահանդեսի նախատեսված երկու ամսվա ցուցադրությանը, կավելանա ևս տասնհինգ օր:
