Արման Փաշիկյան. Շանթի աշխարհի չեմպիոն դառնալն անակնկալ չէր
Շախմատի աշխարհի մինչեւ 16 տարեկանների չեմպիոն Շանթ Սարգսյանը եւ նրա մարզիչ Արման Փաշիկյանը այսօր հանդիպեցին լրագրողների հետ եւ փորձեցին պարզաբանել Հունաստանում ձեռք բերած հաջողության գաղտնիքները: «Բավական հետաքրքիր մրցաշար էր: Վերջին, ամենակարեւոր խաղում, ոչ-ոքի խաղալով դարձա չեմպիոն: Մեր տարիքային խմբում ընդհանուր առմամբ լավ հանդես եկանք, ունեինք լավ շանսեր, պարզապես վերջում մի քիչ չհերիքեց մեր մյուս շախմատիստներին», - ասաց նորաթուխ չեմպիոնը: «Ես անսպասելի չեմ համարում Շանթի հաջողությունն աշխարհի առաջնությունում, քանի որ վարկանիշով նա 5-րդն էր եւ շատ քիչ էր զիջում իր մրցակիցներին: Պարզապես նա սիրում է զգուշավոր խաղալ: Աշխարհի առաջնության մեկնարկից առաջ նրան ասացի, որ պետք է ավելի ագրեսիվ ու հարձակողական շախմատ խաղա: Այս անգամ նա ավելի հաջող մեկնարկեց եւ մինչեւ վերջ պահպանեց առավելությունը»,- ասաց Արման Փաշիկյանը: Ինչպես նշեց գրոսմայստերը, մեր պատանի շախմատիստներն ընդհանուր առմամբ վատ հանդես չեկան, Տիգրան Սարգսյանը եւ Արթուր Դավթյանը կարողացան միջազգային կարգի նորմա լրացնել: Սակայն նա չի թագցնում, որ իր սպասելիքներն ավելի շատ էին: «Մենք եւս մի քանի մեդալներ էինք ակնկալում, քանի որ Արամ Հակոբյանն ու Աննա Սարգսյանը իրենց տարիքային խմբում 2-րդն էին վարկանիշով: Ցավոք, նրանք չդիմացան մրցաշարի լարվածությանը եւ պարտվեցին իրենց գլխավոր մրցակիցներին: Աննայի մոտ կարծես հոգնածություն նկատվեց, քանի որ նա մինչ այդ մասնակցել էր հանաշխարհային օլիմպիադային», - պարզաբանեց Արման Փաշիկյանը: Շանթ Սարգսյանը խոսելով առաջիկա անելիքների մասին, նշեց, որ Հայաստանի հավաքականի կազմում պատրաստվելու է պատանիների համաշխարհային օլիմպիադային: Մրցաշարը մեկնարկելու է նոյեմբերի 25-ին: Շանթ Սարգսյանից բացի թիմում ընդգրկվել են Արթուր Դավթյանը, Արմեն Բարսեղյանը, Մամիկոն Ղարիբյանն ու Աննա Խաչատրյանը: Հավաքականի գլխավոր մարզիչն է Արտաշես Մամիկոնյանը: Հավելենք, որ Շանթ Սարգսյանը սովորում է Բենիամին Ժամկոչյանի անվան թիվ 119 դպրոցի 11-րդ դասարանում: Միաժամանակ սովորում է գրոսմայստերական դպրոցում, Արման Փաշիկյանի մոտ:
