Մանվել Գրիգորյանի վերաբերյալ փաստաթուղթը բժշկական գաղտնիք է պարունակում
ՀՀ Արդարադատության նախարարությունը արձագանքել է «Երեւան-Կենտրոն» ՔԿՀ-ում գտնվող Մանվել Գրիգորյանի առողջական վիճակի մասին Օմբուդսմենի գրությանը։ Այս մասին «Ա1+»-ին հայտնեց Մարդու Իրավունքների գրասենյակի հանրային Կապերի բաժնի պետ Նունե Հովսեփյանը։ «Արդարադատության նախարարությունից ստացվել է անհրաժեշտ պարզաբանումը, բայց քանի որ դրանում բժշկական գաղտնիք պարունակող տվյալներ կան, այս պահին այլ տեղեկություններ չեմ կարող տալ։ Գործը քննարկման ընթացակարգում է «,-ասաց նա։ Այստեղ նաեւ տեղեկացրեցին, որ հենց ձերբակալման առաջին օրը Մարդու Իրավունքների պաշտպանը այցելել է Մանվել Գրիգորյանին, իսկ դրանից հետո մշտապես ակտիվ կապ են պաշտպանել Գրիգորյանի փասատաբանի հետ: «Ինչ վերաբերում է նրա առողջությանը, ապա լրացուցիչ այց է կատարվել քրեակատարողական հիմնարկ առողջապահական նյութերին ծանոթանալու նպատակով: Հավելյալ տեղեկությունն տվել է նաեւ Գրիգորյանի փաստաբանը: Այդ ամենի մասին ամփոփիչ գրություն էր կազմվել եւ ուղարկվել է Արդարադատության նախարարություն համապատասխան հարցադրումներով»,-նշեց Նունե Հովսեփյանը։ Հիշեցնենք, որ օրերս Մանվել Գրիգորյանի պաշտպան Արսեն Մկրտչյանը ահազանգել էր որ Գրիգորյանի առողջական վիճակն անտանելի վատ է եւ օր -օրի ավելի է վատանում։ «Այն նյութատեխնիկական բազան եւ բուժանձնակազմը, որով ՔԿՀ-ն հագեցված է, ծառայում է իր նպատակին, սակայն դա բավարար չէ գոնե վիճակը կայուն պահելու համար»,- ասել էր նա։ Մանվել Գրիգորյան կալանավորվել է հունիսի 19-ին , նա մեղադրվում է ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելու, իրացնելու, պահելու, փոխադրելու կամ կրելու մեջ, որը կատարվել է մի խումբ անձանց կողմից նախնական համաձայնությամբ: Այս արարքը պատժվում են ազատազրկմամբ՝ երկուսից վեց տարի ժամկետով: Նա մեղադրվում է նաեւ առանձնապես խոշոր չափերի յուրացում կատարելու մեջ։ Հոդվածը նախատեսում է չորսից ութ տարի ժամկետով ազատազրկում՝ գույքի բռնագրավմամբ կամ առանց դրա:
