«Ա1+»-ը եթեր կարող է ունենալ միայն 2020թ.-ին (տեսանյութ)
«Ա1+» հեռուստաընկերությունը կապուղիների մրցույթին մասնակցելու հնարավորություն կստանա 2020 թվականին, ըստ օրենքով սահմանված դրույթի: Այսօր նշեց Հեռուստատեսության եւ ռադիոյի ազգային հանձնաժողովի անդամ Արմեն Մկրտչյանը: «Հեռուստատեսության և ռադիոյի մասին օրենքով մրցույթները և ժամանակացույցը տրվում է օրենքով, լիցենզիաները տրվում են 10 տարին մեկ, մրցույթը լինում է 10 տարին մեկ: Նախորդը եղել է 2010 թվականին, հաջորդ մրցույթը լինելու է 2020 թվականին ըստ օրենքի, կարող են մրցույթին մասնակցել բոլոր ցանկացողները»,- ասաց նա: Հեռուստատեսության եւ ռադիոյի ազգային հանձնաժողովի գրասենյակում այսօր Հանրային հեռուստառադիոընկերության խորհրդի անդամների ընտրության հանձնաժողովի անդրանիկ նիստն էր: Խորհորդը նոր է ձևավորվում։ Նրա անդամներն են Գյումրու «Ասպարեզ ակումբի» ղեկավար Լևոն Բարսեղյանը, Մշակույթի փոխնախարար Նազենի Ղարիբյանը, ԿԳ փոխնախարար Հովհաննես Հովհաննիսյանը, «ժուռնալիստների միության» նախագահ Սաթիկ Սեյրանյանը և Համլետ Գասպարյանը՝ Հեռուստատեսության եւ ռադիոյի հանձնաժողովից: ՀՌԱՀ անդամ Տիգրան Հակոբյանն ասաց, որ այն մարդիկ են ընտրվել, ովքեր հնարավորինս օբյեկտիվ և փորձառու են իրենց բնագավառներում և իրենց ասածը կասկած չի հարուցի հասարակության մեջ: «Բավականին լուրջ առաջադրանք է դրված հանձնաժողովի վրա, որը պետք է ընտրի Հանրային հեռուստաընկերության խորհրդի կազմը: Սա մեծ պատասխանատվություն է»,- ավելացրեց Արմեն Մկրտչյանը: Խորհուրդն այսօր ընտրեց նաև ՀՌԱՀ-ի նախագահ: Առաջադրվեց Լևոն Բարսեղյանի և Համլետ Գասպարյանի թեկնածությունը: Երեք կողմ ձայնով նախագահ ընտրվեց Համլետ Գասպարյանը: Խորհուրդը ընտրվում է վեց տարով և անդամները աշխատելու են անվճար հիմունքներով: