Շարմազանովն իրավունք չունի տնտեսագիտության մասին կարծիք հայտնելու. տնտեսագետ (տեսանյութ)
Կառավարության ծրագիրը կարճաժամկետ է, մինչ առաջիկա խորհրդարանական ընտրություններ, ասում է տնտեսագետ Մովսես Արիստակեսյանը: «Այս ծրագրի առանցքային նպատակը թավշյա հեղափոխության ամրագրումն է: Այս ծրագրի դեպքում չպետք է արձանագրել արդյունքային ցուցանիշներ: Երբ որոշ պաշտոնյաներ խոսում են արդյունքային ցուցանիշների մասին, ապա պետք է նախ ներկայացնեն նախկին ղեկավարության վերջին տարիների ընթացքում ցույց տված արդյունքները»: Տնտեսագետի խոսքով, սա ցանկությունների և բարի հեքիաթների ծրագիր չէ, ինչպես ասում է ԱԺ փոխխոսնակ Էդուարդ Շարմազանովը: «Պատմաբանն իրավունք չունի տնտեսագիտության մասին կարծիքներ հայտնելու: Չկա մի երկիր, որ մեկ տարվա ժամկետի համար կարողանա արդյունքային ցուցանիշներ հրապարակել, մանավանդ, որ գնում ենք ընտրությունների: Շարմազանովը գոնե պետք է ասի, որ իրենց ղեկավարության օրոք գրանցած ցուցանիշները իրական չեն: Նրանք ասում են, թե ՀՀԿ-ն 7,5 տոկոսանոց տնտեսական աճով է իշխանությունը փոխանցել նոր կառավարիչներին, բայց դա մեծ կեղծիք է, չկա այդպիսի աճ»: Ըստ Արիստակեսյանի՝ այս ծրագրում անպայման պետք է փոխվի ՀՀ ազգային անվտանգության ռազմավարությունը, որն արդեն 10 տարվա վաղեմություն ունի: Անդրադառնալով մյուս առաջարկներին, Արիստակեսյանն ասաց, որ ծրագրում նշելով ցեղասպանության ճանաչմանը հետամուտ լինելու հարցը, իշխանությունները պետք է հայտարարեն մի կարևոր կետ, այն է՝ նշել, ցեղասպանության արդյունք հանդիսացող հայրենազրկման, տարածքային, ժողովրդագրական, տնտեսական, սոցիալական կառույցների համար փոխհատուցման քաղաքականություն սկսելու մասին:
