Անդրիաս Ղուկասյանը նվազագույնը դեռ 6 ամիս կմնա կալանքի տակ (տեսանյութ)
Սահմանադրական դատարանը պետք է որոշի, որքանով է օրինական «Նոր Հայաստան» շարժման անդամ Անդրիաս Ղուկասյանի գործով կալանքի որոշումը։ Այսօր Վճռաբեկ դատարանը որոշեց դիմել Սահմանադրական դատարան՝ ստորին ատյանների կայացրած որոշումների սահմանադրականության հարցով։ «Ինչ արեց Վճռաբեկ դատարանը: Ըստ էության ընդունեց, որ մենք ճիշտ ենք ասում, որ այդ որոշմամբ խախտվել է Անդրիաս Ղուկասյանի սահմանադրական եւ կոնվենցիոն իրավունքները եւ որոշեց գործի վարույթը կասեցնել: Դիմել Սահմանադրական դատարան՝ որոշելու համար այդ հոդվածների սահմանադրականությունը: Փաստացի ընդունել են, որ խախտում է տեղի ունեցել»,- «Ա1+»-ին ասաց Անդրիաս Ղուկասյանի պաշտպան Կարեն Մեժլումյանը: Առաջին ատյանի դատավորն, ըստ պաշտպանի, երբ գործը վերցրել է վարույթ, ընդամենը 4 բառ գրելով՝ Անդրիաս Ղուկասյանի խափանման միջոցը թողել է անփոփոխ: Մինչդեռ պետք է հստակ նշվի, թե անձը ինչ գործողություններ կարող է կատարել ազատության մեջ հայտնվելով: ՍԴ-ն դիմումը ստանալուց հետո առնվազն 6 ամսում պետք է որոշում կայացնի, այդ ընթացքում փաստացի Անդրիաս Ղուկասյանը կշարունակի մնալ կալանավորված: «Սա մի իրավիճակ է, երբ Անդրիաս Ղուկասյանն ամենակոպիտ խախտումներով կալանքի տակ էր պահվում, Վճռաբեկ դատարանն էլ մի որոշում կայացրեց, որպեսզի չասի, այդ խախտումները կան, թե չկան»,- ավելացնում է պաշտպանը: Կարեն Մեժլումյանը կարծում է, որ կալանքի գործով որոշումները ՍԴ դիմելու հիմքով կասեցնելը եւ անձին ազատ չարձակելը նույնպես Սահմանադրության խախտում է. «Անձը կալանքի տակ է գտնվում, լավ ազատ արձակեք, նոր դիմեք: Սա խախտում է անձի իրավունքը: Հավանաբար մենք էլ Անդրիաս Ղուկասյանի հետ քննարկելով կդիմենք Սահմանադրական դատարան, այդ նորմի սահմանադրականության հարցով»: Գործով խախտումներն, ըստ Կարեն Մեժլումյանի, շատ են: Ըստ նրա՝ ակնհայտ է, որ պաշտպանյալի նկատմամբ քաղաքական հետապնդում է իրականացվում։ «Առաջին օրվանից մինչ օրս հետեւողականորեն քաղաքական նպատակներով Անդրիաս Ղուկասյանին կալանքի տակ են պահում, քրեական հետապնդում են իրականացնում»: Անդրիաս Ղուկասյանը մոտ 2 տարի է կալանավորված է: Նա մեղադրվում է 2016 թ հուլիսի 29-ին զանգվածային անկարգություններ կազմակերպելու, ինչպես նաեւ ՊՊԾ գնդում գտնվող անձանց միանալու փորձի մեջ, որը ավարտին չի հասցվել՝ նրա կամքից անկախ հանգամանքներով: Այս մեղադրանքն առաջադրվել է եւս 8 անձի, բայց նրանց խափանման միջոցը փոխվել է եւ նրանք ազատության մեջ են։