Ադրբեջանում նախագահի ընտրություններն անցել են բազմաթիվ խախտումներով. ԵԱՀԿ / ԺՀՄԻԳ
Միջազգային դիտորդներն ամփոփելով Ադրբեջանում կայացած նախագահի արտահերթ ընտրությունների նախնական արդյունքները՝ հանդես են եկել եզրափակիչ հայտարարությամբ: Հայտարարության համաձայն, Ադրբեջանում նախագահական ընտրությունները անցկացվել են հիմնարար իրավունքների և ազատությունների ապահովումը խոչընդոտող օրենքների պայմաններում, իսկ հիմնարար իրավունքներն ու ազատությունները ժողովրդավարական ընտրությունների նախապայմաններն են: Բազմակարծության բացակայության պայմաններում մյուս թեկնածուները փաստացի զերծ են մնացել գործող նախագահին քննադատելուց, միջազգային դիտորդները սակայն կարողացել են ազատ աշխատել նախընտրական շրջանում: Ընտրությունների օրը դիտորդներն արձանագրել են որոշ պարտադիր ընթացակարգերի համատարած անտեսում, թափանցիկության բացակայություն և բազմաթիվ այլ խախտումներ, այդ թվում՝ լցոնումներ: Նախագահական ընտրությունների նախնական արդյունքներով հաղթել է Իլհամ Ալիևը՝ ստանալով ձայների 86 տոկոսը:
