ՄԻԵԴ-ը քննելու է «Իրավունք» թերթի դեմ հայցը՝ նույնասեռականների վերաբերյալ (տեսանյութ)
Մարդու իրավունքների եվրոպական դատարանը սկսել է քննել «Մինասյանն ու մյուսներն ընդդեմ Հայաստանի Հանրապետության» գործը: Հայցը վերաբերում է 2014 թվականին «Իրավունք» թերթում հրապարակված՝ «Նրանք սպասարկում են միջազգային համասեռամոլ լոբբինգի շահերը. ազգի եւ պետության թշնամիների սեւ ցուցակը» հոդվածին, որտեղ թերթը ներկայացնում է 60 անձից բաղկացած «սեւ ցուցակ» եւ կոչ է անում դադարեցնել շփումն այդ մարդկանց հետ, չհանդուրժել նրանց, ինչպես նաեւ հեռացնել աշխատանքից: «Սև ցուցակում» հայտնված անձինք 2014 թվականի հունիսի 16-ին դիմել էին առաջին ատյանի դատարան՝ պնդելով, որ թերթը չարաշահել է խոսքի ազատության իրավունքը և վիրավորել իրենց։ Քաղաքացիները պահանջում էին ներողություն խնդրել, հերքում տպել և 5 միլիոն դրամ վճարել որպես բարոյական վնասի փոխհատուցում։ Սակայն Հայաստանի դատարանները հայցը չէին բավարարել՝ համարելով, որ լրագրողն օգտվել է խոսքի ազատության իր իրավունքից։ Գործով փաստաբան Նվարդ Փիլիպոսյանը նշեց, որ Հայաստանը խախտել է արդար դատաքննության իրավունքները։ «Մեր պետությունը՝ ի դեմս դատարանների, ճիշտ ձեւով չի գնահատել ատելության կոչերը եւ համարել է դրանք խոսքի ազատության շրջանակներում: Այս հարցը որեւէ այլ տեղ չէինք կարող բարձրաձայնել, բացի միջազգային ատյաններից: Ինչո՞ւ է այդ դեպքում պատասխանողը պետությունը, քանի որ Հայաստանը պարտավորվել է պաշտպանել իր քաղաքացիներին, բայց իր պարտավորությունները չի իրականացրել»: