«Էն Վլադիմիր Պուտինին ասեք՝ փոխեն սրանց» (տեսանյութ)
«Սասնա ծռեր» խմբի անդամ Արայիկ Խանդոյանին դատարանում հետաքրքրում է մի հարց, ինչին ոչ ոք չէր սպասում. «Էն Վլադիմիր Պուտինին ասեք՝ փոխեն սրանց, մեղք են, մեր հագով չեն»։ Սակայն Արայիկ Խանդոյանին չի հաջողվում խոսքն ավարտին հասցնել, ուղեկցող գումարտակի ներկայացուցիչը բարձրախոսը վերցնում է նրա ձեռքից: Քիչ անց բարձրախոսը կրկին հայտնվում է Խանդոյանի ձեռքում: «Ոնց եք, իմ հայ ժողովուրդ, մեռնեմ ձեզ, լավ եղեք: Մենք լավ ենք, կանգուն մեր լեռների պես: Ախպերներիս լիքը բարեւներ, մեր սար ու ձորին լիքը բարեւներ» Դատական նիստին ներկա էին տուժողներ։ Նրանք եկել էին ասելու, որ չեն ցանկանում մասնակցել դատական հաջորդ նիստերին: Սմբատ Բարսեղյանի պաշտպան Հայկ Ալումյանը միջնորդություն ներկայացրեց «Սասնա ծռեր»-ի 3 գործերը մեկ վարույթում միացնելու համար: Նման միջնորդություններ ներկայացվել էին մյուս երկու դատավարությունների ժամանակ։ «Նշված երեք գործերը վերաբերում են նույն ենթադրյալ դեպքին, 3 գործով անցնող ամբաստանյալներին մեղսագրվում են 2016 հուլիսի 17-ին ՊՊԾ տարածքը գրավելու եւ այդ տարածքում մինչեւ հուլիսի 31-ը կատարված գործողություններ»,- ասաց պաշտպանը: Երեք գործով անցնում են նույն տուժողներն եւ վկաները: Ստացվում է ՝ նրանք հարցաքննվեն ոչ թե մեկ, այլ երեք անգամ: Փաստաբանը վստահ է, որ դատավճիռներ կայացնելու փուլում խախտումներն ավելի ակնհայտ են դառնալու: «Այսպես՝ եթե դատավարությունների ընթացքում եւ արդյունքների մասին երեք դատավորների միջեւ դեռեւս չկա նախնական պայմանավորվածություն, ապա ենթադրվում է, որ երեք դատավարություններն ավարտվելու են տարբեր ժամանակ: Երբ դատավորներից մեկ էլ վճիռ կայացրեց, ապա մյուս երկու գործերով ամբաստանյալների անմեղության կանխավարկածը խախտված է լինելու»,- ավելացրեց Հայկ Ալումյանը: Դատական հաջորդ նիստին՝ նոյեմբերի 15-ին, միջնորդության վերաբերյալ կարծիքներ կհայտնեն պաշտպանները:
