Սիրիական հակամարտությունը ՀՀ-ի համար վտանգ է ստեղծում. փորձագետ
Սիրիական հակամարտության սրացմանը զուգընթաց՝ պառակտվելու է սիրիահայ և հատկապես հալեպահայ համայնքը: Դրա հետևանքով կավելանա սիրիահայերի հոսքը դեպի Հայաստան, ինչը այս շրջափուլում հավելյալ տնտեսական դժվարություններ կստեղծի պետության համար, քանի որ նրանց տեղավորելը և աշխատանքով ապահովելը բավականին բարդ է: Նման կարծիք այսօր կայացած ասուլիսին հայտնեց տարածաշրջանային հարցերով փորձագետ, թուրքագետ Մուշեղ Խուդավերդյանը: Ըստ նրա, Հայաստանի սպառնացող երկրորդ վտանգը ԻՊ խմբավորման ազդեցության գոտիների ընդլայնումն է: «Հայաստանը քրիստոնյա և հետևաբար ծայրահեղականների համար ոչ ցանկալի երկիր է, և ինչքան որ ԻՊ գործողությունների գոտիները մոտենան հայաստանյան սահմաններին, այնքան նրանից վտանգը կավելանա»,- շեշտեց նա: Բացի այդ, ծայրահեղականները հակաքրիստոնեական կոչեր հնչեցնելիս քանդում են նաև հայկական եկեղեցիները: Ըստ Մուշեղ Խուդավերդյանի, Սիրիայում պայքարը նմանվում է փոքրիկ համաշխարհային պատերազմի, որը մղվում է և արևմտյան բլոգի, այսինքն ՆԱՏՕ-ի, նույն ինքը Եվրոպայի և ԱՄՆ-ի և արևելյան բլոգի՝ Ռուսաստանի, Չինաստանի և Իրանի միջև: Այս համատեքստում չի կարելի մոռանալ Թուրքիայի դերը, որն ունի հետաքրքիր կեցվածք. «Թուրքիայի նախագահ Ռեջեփ Թայիբ Էրդողանը փորձում է վարել ԱՄՆ-ից անկախ քաղաքականություն և ցույց տալ, որ Թուրքիան տարածաշրջանի առաջնորդն է, բայց միաժամանակ հստակ գիտակցելով, որ եթե Թուրքիան Սիրիայում չսպասարկի ՆԱՏՕ-ի շահերը, նա մեկ օր էլ չի մնա ՆԱՏՕ-ի կազմում: Թուրքիայում առկա ԱՄՆ-ի շուրջ 19 ռազմաբազաները կապում են Էրդողանի ձեռքերը Սիրիայում անկախ գործելու առումով»,- նշեց նա: Փորձագետի կարծիքով, թուրքական կողմը պայքար է մղում Սիրիայի և Իրաքի քրդերի միավորման դեմ. «Միաժամանակ Եփրատի գործողությունը ցույց տվեց, որ Սիրիայի տարածքը բաժանված է ՆԱՏՕ-ի և արևելյան բլոգի միջև, և նրանցից որևէ մեկի ոտնձգության դեպքում նրանք միմյանց հասցնում են արժանի հակահարվածներ»,- նշեց Մուշեղ Խուդավերդյանը: Ըստ նրա, ժնևյան բանակցությունները Սիրիայի հարցում դեռևս հաշտության համաձայնեցման իմիտացիա են, ինչի վառ ապացուցն են վերջին դեպքերը. «Քիմիական հարձակման փաստը դեռևս հաստատված չէ, քանզի արևմտյան բլոգի՝ ՆԱՏՕ-ի գործելաոճերից մեկն է հարձակումից առաջ դիմացինին մեղադրել քիմիական կամ զանգվածային ոչնչացման զենք ունենալու և կիրառելու մեջ»: «Թրամփի այս քայլից պարզ է դառնում, որ նա կրկնում է նույն Օբամայի, նույն Բուշի վարչակազմի գործողությունները, որոնք միտված են լարվածության էլ ավելի մեծացմանը, և ղեկավարությունը ԱՄՆ-ում շահագրգռված է լարվածության աճին, անկախ նրանից, թե ով կլինի նախագահը: Թրամփը, ինչպես իր նախորդները, հակված է ԱՄՆ-ի ազդեցության գոտիները ընդլայնելու՝ ի հաշիվ արևելյան ազդեցության գոտիների»,- ընդգծեց փորձագետը՝ հավելելով, որ ռուս-ամերիկյան հարաբերությունները այս առումով մշտապես լինելու են լարված և անկայուն, քանի դեռ ԱՄՆ-ն փորձում է ընդլայնել իր ազդեցությունը ի հաշիվ ռուսական ազդեցության գոտիների, և որ առաջիկայում հաշտության եզրեր չեն երևում :
