«Թփերի տակ թաքնված որևէ քրեաօլիգարխիկ պարտիզան կգա առաջ» (տեսանյութ)
««Ազատ դեմոկրատների» ցուցակում, բացի կուսակցության անդամներից, ընդգրկված են անձինք, որոնք բոլորը միասին ունեն մեկ հստակ տեսլական՝ Հայաստանը որպես ինքնիշխան, իրավական պետություն՝ դեպի եվրոպական պետությունների ընտանիք գնացող»,-լրագրողների հետ հանդիպման ժամանակ ասաց Անահիտ Բախշյանը, որը կուսակցության 101 հոգանոց ցուցակում զբաղեցնում է 4-րդ հորիզոնականը: Տիկին Բախշյանը նշեց, որ մրցակից է համարում բոլոր կուսակցություններին և դաշինքներին: Նրա խոսքով՝ խորհրդարան են գնում՝ բարձրացնելու սոցիալական, էկոլոգիական և կրթական հարցեր: «Անձամբ ես, բացի կրթությունից, գնում եմ, որպեսզի ևս մեկ անգամ բարձրացնեմ մանկատան շրջանավարտների բնակարանային խնդիրը»,-ասաց Անահիտ Բախշյանն՝ ընդգծելով, որ կուսակցության ցուցակի 60 տոկոսը երիտասարդներ են, 40 տոկոսը՝ կանայք: Քննարկմանը ներկա՝ ԳԽ նախկին պատգամավոր Ազատ Արշակյանն էլ հավելեց, որ համակրում է Օհանյան-Րաֆֆի-Օսկանյան դաշինքին: Խոսելով ՀՀԿ ցուցակի մասին՝ պարոն Արշակյանն այն համեմատեց հին հայկական ֆիլմի՝ «Խաթաբալայի» հետ. «Մեկին ցույց են տալիս, մյուսին՝ ընտրում: Չեն կարող երկու ամսում մեզ համոզել, որ նոր են, լավն են, և քրեաօլիգարխիկ ուժերը հեռացել են: Սա դիմակ է: Նոր դեմքերը, օրինակ՝ Վիգեն Սարգսյանը, ներկայանալի են, բայց մենք գիտենք, որ նա հեռանալու է, գնալու է իր պաշտոնին, իսկ նրա փոխարեն թփերի տակ թաքնված որևէ քրեաօլիգարխիկ պարտիզան կգա առաջ»:
