Հայաստանից Ռուսաստան՝ ID քարտերով (տեսանյութ)
Մոսկվա կատարած այցից հետո կառավարության ղեկավարի հանձնարարականներն այսօր վերաբերում էին այնտեղ ձեռք բերված պայմանավորվածություններին: Կարեն Կարապետյանը տնտեսական զարգացման եւ ներդրումների նախարարին հանձնարարեց ռուսական համապատասխան գերատեսչությունների հետ քննարկել եւ ակտիվ աշխատել ներդրումային հիմնադրամ ստեղծելու համար: Գյուղատնտեսության նախարարին վարչապետը հանձնարարեց հանդիպել ռուս գործարարների հետ ու կազմակերպել գյուղատնտեսական անհրաժեշտ տեխնիկայի ներմուծում. «Շատ ինտենսիվ, կպած անում ենք»,- հավելեց վարչապետը: Կարեն Կարապետյանը հիշեցրեց, որ Ռուսաստանից Հայաստան եւ հակառակը, քաղաքացիները կարող են այցելել տեղային անձնագրով` ID քարտերով: Ազգային անվտանգության ծառայության ղեկավարին նա հանձնարարեց ապահովել տեխնիկական մասը: Զբոսաշրջությունը զարգացնելու նպատակով էլ՝ զբոսաշրջության վարչության պետին հանձնարարեց ՌԴ քաղաքացիների համար պատրաստել զբոսաշրջության լայն փաթեթ եւ մինչև մարտի 15-ը ներկայացնել հաշվետվություն: Հետո որոշեց, որ դա շատ երկար ժամկետ է. «Չէ, դա շատ է, մարտի 1-ին ներկայացրեք»,- հավելեց նա:
