Սարի թաղի գործով կալանավորվածը կմնա կալանքի տակ
Նազիկ Թորոսյանը դատարան է եկել հետեւելու՝ 4 ամիս առաջ կալանավորված որդու դատավարությանը։ Հարություն Թորոսյանը մեղադրվում է հուլիսի 17-ին Սարի թաղում իշխանության ներկայացուցչի նկատմամբ վտանգավոր բռնություն գործադրելու մեջ: « Սարի թաղը զրկել էին հոսանքից, տրանսպորտի միջոցից, ամենակարեւորից՝ Սարի թաղ բարձրանալը եւ իջնելը ամռան այդ տապին շատ դժվար էր: Փոխանակ պատժեին այն մարդկանց, ովքեր պատասխանատու են այդ ամենի համար պատժում են մեր երիտասարդներին, ովքեր հունից դուրս եկած՝ ելել էին բողոքի»,- «Ա1+»-ին ասաց Հարություն Թորոսյանի մայրը՝ Նազիկ Թորոսյանը: Բացի Հարություն Թորոսյանից, գործով անցնում են նաեւ Հրայր Իսախանյանը, Անդրանիկ Քյոսեյանը եւ Էդուարդ Զեյթունյանը։ Վերջինիս պաշտպանը միջնորդություն ներկայացրեց նրան անհապաղ ազատ արձակելու վերաբերյալ: Երկամսյա կալանքի ժամկետը լրացել է եւ չի երկարացվել։ «25.09.2016 թ. առ այսօր, Էդուարդ Զեյթունյանին կալանքի տակ պահելու վերաբերյալ առկա չէ դատարանի որեւէ որոշում, հետեւաբար ենթակա է անհապաղ ազատ արձակման»,- նշեց պաշտպան Լիպարիտ Սիմոնյանը: Դատավոր Աննա Դանիբեկյանը 1 ժամից ավել խորհրդակցական սենյակում մնալուց հետո, որոշեց մերժել միջնորդությունը: Դատական հաջորդ նիստին խափանման միջոցը գրավով կամ ստորագրությամբ փոխելու միջնորդություն է ներկայացնելու Հրայր Իսախանյանի պաշտպանը : Գրիշա Բալասանյանի խոսքերով, որեւէ ապացույց չկա նրա դեմ, բացի այդ, իր պաշտպանյալն ունի առողջական խնդիրներ: «Այս ընթացքում նա չի բուժվել, հոգեկանի հետ կապված խնդիր ունի, թոքերի հետ կապված խնդիր ունի եւ անհապաղ բուժում է պետք, իսկ այս պայմաններում ստացիոնար բուժում չի կարող ստանալ, ստացիոնար բուժում է անհրաժեշտ»: Դատական նիստը կշարունակվի նոյեմբերի 25-ին:
