Պտուղների արտադրությունը Հայաստանում շահեկան չէ (տեսանյութ)
Պտուղների արտադրությունը Հայաստանում առանձնապես բարձր շահութաբերություն չի ապահովում, ցածր է բերքատվությունը, եւ բնականաբար այն չի շահագրգռում մեր գյուղատնտեսական ընկերություններին՝ ընդարձակելու պտղատու այգիները. «Պտղաբուծությունը հազարամյակների ընթացքում կազմակերպվել է սերմնաբույսի վրա պատվաստված տնկանյութի միջոցով, որը շատ բարձր սաղարթ է ձեւավորում եւ միավոր տարածքի վրա շատ փոքրաթիվ տնկիներ է հաջողվում տեղադրել: Ստացվում է ցածր բերք, ոչ առանձնապես բարձր ապրանքային տեսքով, եւ այն չի կարողանում բարձր արդյունք ապահովել գյուղացու համար»,- «Ժամանակակից տեխնոլոգիաներով ինտենսիվ պտղաբուծության զարգացման հեռանկարները ՀՀ-ում» թեմայով քննարկման ժամանակ ասաց ՄԱԿ-ի Պարենի և գյուղատնտեսության կազմակերպության փորձագետ Գառնիկ Պետրոսյանը: Նրա խոսքերով՝ կարեւորը տեղում տնկարանների զարգացումն ապահովելն է, որը հնարավորություն կտա ստանալ շատ ավելի ցածր ինքնարժեքով, շատ ավելի մատչելի գնով տնկանյութ եւ տեղում կազմակերպել դրա արտադրությունը: Ըստ ՄԱԿ-ի փորձագետի՝ պետության միջամտությունը խիստ կարեւոր է եւ անհրաժեշտ, պետք է լուծել նաեւ երկարաժամկետ վարկերի խնդիրը. «Ծիրանենու, դեղձենու, կեռասենու եւ սալորենու զարգացումը կարող է շահեկան լինել մեր գյուղատնտեսության համար»: Այսօրվա սեմինար-քննարկմանը կհետեւի գործնական դասընթաց: Դասընթացի ընթացքում փորձագետները կներկայացնեն խնձորենու հանգստի շրջանի էտի տեխնիկան՝ նպատակ ունենալով բարելավել ինչպես ծառերի աճն, այնպես էլ բերքի քանակական եւ որակական հատկությունները:
