Տավուշի մարզում դպրոցականները զինվորական երդում են տվել (տեսանյութ)
Տավուշի մարզի Այրում քաղաքում հետաքրքիր իրադարձություն է կայացել: Սահմանամերձ այս մարզի Այրում քաղաքի միջնակարգ դպրոցում կայացել է 1-ին դասարանցիների զինվորական երդման արարողություն: Միջոցառման կազմակերպիչը դպրոցի վաստակաշատ մանկավարժ Սուսաննա Մակարյանն է, ով մայրենի լեզվի տառերն է ուսուցանում անկախ Հայաստանի արդեն 25-րդ սերնդին:
Այրում քաղաքի այս դասարանը տարբերվում է հանրակրթական դպրոցների մնացած դասարաններից տղաների մեծ քանակով: Մի դասարանում սովորում են 23 տղա երեխաներ: «Սա բացառիկ դեպք է ոչ միայն մեր դպրոցի, այլև մեր երկրի պատմության մեջ: Զինվորական լեզվով ասած այս դասարանը մի դասակ է, որը մեկ տասնամյակ անց կանգնելու է հայրենիքի սահմանների պաշտպանության համար, և ես հպարտ եմ որ հենց ինձ է բախտ վիճակվել նրանց առաջին ուսուցիչը լինելու պատիվը՚,- նշում է դասվար Սուսաննա Մակարյանը:
Երեխաների մեջ հայրենասիրություն պետք է սերմանել ամենասկզբից, որպեսզի հետո արդեն ուշ չլինի, պատմում է դասվարը, և տեղեկացնում, որ կայացած միջոցառումը 1-ին դասարանցիների տարեկան ավարտական միջոցառումն է՝ հրաժեշտն այբենարանին, որը ռազմահայրենասիրական բովանդակություն է ստացել: «Քառօրյա ատերազմը բոլորիս ստիպեց կյանքին բացառապես այլ տեսանկյունից նայել, բոլորս ևս մեկ անգամ հասկացանք բանակի կարևորություն ու մեր անվտանգության արժեքը: Հասկացանք, որ անհրաժեշտ պահին պետք է բոլորս պատրաստ լինենք հայրենիքի զինվորը դառնալ: Այս միջոցառման խորհուրդը հենց դա է. հայրենիքի զինվորը բոլորս ենք, անկախ տարիքից, սեռից և մասնագիտությունից՚:
Միջոցառման առավել հուզիչ և ուշագրավ դրվագը զինվորական երդման արարողությունն էր: Սահմանամերձ շրջանի դեռևս 6 տարեկանը չբոլորած փոքրիկները խրոխտ և վստահ արտասանեցին զինվորական երդման տեքստը, որը հուզեց բոլոր ներկաներին:
«Ես ինքս զինծառայողի մայր եմ, իմ որդին հայոց բանակի սպա է, և ինձ համար պատերազմը այդ 4-օրով չի սահմանափակվել, մեզ համար պատերազմն ամեն օր է իսկ բանակը նախ և առաջ մեր ընտանիքներն են, որոնց ամրությունից էլ գալիս է երկրի ամրությունը՚,- մեզ հետ զրույցում ասաց Ս. Մակարյանը:
Կայացած միջոցառման առավել հուզական դրվագը՝ Փոքրիկների զինվորական երդման արարողությունը առաջարկում ենք դիտել ստորև.
