Բացօթյա դաս՝ Երևանի կենտրոնում (տեսանյութ)
«Երևանյան ամառ» ծրագրի շրջանակներում Երևանի քաղաքապետարանի Յուրի Բախշյանի անվան մանկական ֆիլհարմոնիայի սաներն այսօր բացօթյա բաց դաս էին կազմակերպել, որի ժամանակ նվագում էին հայ մեծանուն կոմպոզիտորների ստեղծագործությունները:
Մայիսի 25-30 ֆիլհարմոնիայի սաները Բաթումում կայացած «Ոսկե դելֆին» միջազգային մրցույթ-փառատոնին «Գործիքային երաժշտություն» անվանակարգում արժանացել են Գրան պրի մրցանակին: Մրցույթին մասնակցել է 8 երկիր: Ֆիլհարմոնիայի փոխտնօրեն Ալլա Նալբանդյանը «Ա1+»-ի հետ զրույցում նշեց, որ քաղաքապետարանի համակարգում գործող բոլոր մշակութային օջախներում այժմ այսպիսի բաց դասեր են անցկացվում՝ տարբեր ստեղծագործական կոլեկտիվների մասնակցությամբ:
«Մենք արդեն երկրորդ անգամ է ընտրեցինք ժողովրդական գործիքների նվագախմբի մասնակցությունը այս ծրագրին, որովհետև փորձը ցույց է տալիս, որ բացօթյա բաց դասն ավելի հետաքրքրիր է լինում և ավելի ջերմ, ու բուռն ընդունելություն է ցուցաբերվում հանդիսատեսի կողմից: Յուրաքանչյուր սան ինչ-որ մի ստեղծագործության պատառիկ էր նվագում կամ երգում: Այսպես շատ ավելի հետաքրքիր է ստացվում: Կարծում եմ, որ նման միջոցառումները շարունակական կլինեն»,- ասաց Ալլա Նալբանդյանը:
Վերջինիս խոսքերով՝ յուրաքանչյուր նվագախումբ ունի իր երգացանկը և որ երգն ավելի լսելի կլինի հանդիսատեսի կողմից, հենց այդ ստեղծագործություններն էլ նվագում են:
«Նրանք իրենց պահուստում ունեն բավականին շատ ստեղծագործություններ՝ և ազգային և ժողովրդական երաժշտության, ինչպես նաև դասական երաժշտության կատարումներ»,-ասաց տիկին Նալբանդյանը:
Ինչո՞վ է կարևոր սաների համար նման միջոցառումներին մասնակցելը: Հարցին Ալլա Նալբանդյանը պատասխանեց.
«Կարևորը նրանք լավ մարդ են դաստիարակվում, երբևէ որևէ վատ բան չեն անի: հավատացած եղեք, եթե անգամ պրոֆեսիոնալ երաժիշտ էլ չդառնան, այն ժամանակաշրջանը, որը նրանք անցկացնում են այստեղ, երեխաներ կան, որ ավելի քիչ են փողոցում լինում և վատ արարքներից ավելի հեռու են: Իրենց հասակակիցներն էլ դա տեսնում են: Յուրաքանչյուր նման բաց դասից կամ իրենց միջոցառումներից հետո մենք նոր երեխաների հոսք ենք ունենում, որոնց մոտ հետաքրքրություն է առաջացել դեպի այս ամենը»:
Դպրոցահասակ երեխաները դուդուկով, շվիով, դհոլով կամ քանոնով մեծ ոգևորվածությամբ նվագում էին: Նվագախմբի ամենակրտսեր մասնակիցը՝ 10- ամյա Տիգրանն, օրինակ, դուդուկով նվագում էր տարբեր գործեր:
«Մենք ունենք միայն մեկ պայման, որ երեխաներն, անպայման, որևէ երաժշտական գործիքի պետք է տիրապետեն, որպեսզի կարողանան հետո ըստ ժանրային ուղղվածության՝ ընդգրկվել ինչ-որ նվագախմբում»,-տեղեկացրեց ֆիլհարմոնիայի փոխտնօրենը:
