Հնդկաստանում հիշեցին Հայոց ցեղասպանությունն ու ապրիլյան պատերազմը
Հնդկաստանի հայ համայնքի ներկայացուցիչները 1915թ-ի Մեծ Եղեռնի զոհերի հիշատակին նվիրված միջոցառում էին կազմակերպել: Դելիի Ջավալհար Ներուի անվան համալսարանում անցկացվեց «Ցեղասպանությունը որպես մարդկության դեմ ոճիր» թեմայով քննարկում, որի հիմնական բանախոսներն էին Դելիի գերագույն դատարանի փաստաբան Ադիտյա Շարման և գրող, ակադեմիկոս Պուրուշոտամ Ագրավալը:
Նրանք իրենց ելույթներում խստորեն դատապարտեցին Ցեղասպանություն երևույթը: Բանախոսները միաժամանակ նշեցին, որ անպատժելիությունն է թույլ է տալիս, որ այսօր կրկնվեն նորանոր ոճրագործություններ:
«Հայ ժողովրդի համար ամենամեծ ողբերգություններից է 1915թ Ցեղասպանությունը: Ու չնայած դրան՝ սփռվելով ողջ աշխարհով, անցնելով շատ դժվարությունների միջով՝ հայերը շարունակում են կերտել, դրսևորել անկոտրում կամք՝ պահպանելու համար իրենց մշակույթն ու ինքնությունը: Այս ժողովրդի հենց այս հատկանիշն է ինձ միշտ հիացրել»,-իր ելույթում նշեց ՀՀ-ում Հնդկաստանի նախկին դեսպան Աչալ Կումար Մալհոտրան:
Քննարկման ընթացքում ներկաների համար ցուցադրվեց Ցեղասպանության մասին պատմող ֆիլմ, այնուհետ տեղի ունեցավ մոմավառություն՝ ի հիշատակ Ցեղասպանության զոհերի ու նաև 2016թ-ի ապրիլյան քառօրյա պատերազմի ժամանակ զոհվածների։
Գայանե Հակոբյան