Հայաստանի եզդիները դիմավորեցին Նոր տարին
Այս տարի եզդիները իրենց գլխավոր տոնը Չարշամա Սարե Սալեն(Նոր տարին) դիմավորեցին ապրիլի 19-ին: «Սինջար» եզդիների ազգային միավորումը տոնը կազմակերպեց սուրբ Սլթան Էզդիդի սրբավայրում: Տոնին մասնակցելու էին եկել հարյուրավոր եզդիներ Հայաստանի տարբեր մարզերից և քաղաքներից: Միավորման ղեկավար Բորիս Մուրազին շնորհավորեց բոլոր ներկաներին և ասաց.«Թող որ այս տարի բարիքի և խաղաղության տարի լինի: Եվ որ ամենակարևորն է` թող այս տարի վերանա մեր միջի ստրուկը, որը այսքան տարի խանգարել է եզդի ժողովրդի առաջընթացին: Իրաքում դեռևս մեր եղբայրներն ու քույրերը ծանր կացության մեջ են և նոր տարում մենք պետք է անենք ամեն ինչ, որպեսզի հաջորդ այս օրը հավաքվելիս նշենք նաև մեր ազգի հաղթանակը: Եվս մեկ անգամ շնորհավորում եմ աշխարհի բոլոր եզդիներին այս սուրբ օրվա կապակցությամբ»,-ասաց Բորիս Մուրազին:
Միջոցառման մասնակիցները վառեցին իրենց նոր տարվա ճրագները և շարունակեցին տոնակատարությունը, ազգային երգ ու պարով:
Հիշեցնենք, որ տոնը նախկինում չէր նշվում Հայաստանում, քանի որ ԽՍՀՄ տարիներին եզդիները կրտվել էին հայրենի բնօրրանից և միայն երեք տարի առաջ «Սինջար» եզդիների ազգային միավորման ջանքերով, այն դարձավ նաև Հայաստանի եզդիների գլխավոր տոնը:
