Հայաստանը միակն է ու վայրենին. ինչ է կատարվում մաքսակետերում (տեսանյութ)
ԱԺ Ֆինանսավարկային եւ բյուջետային հարցերի մշտական հանձնաժողովում քննարկվող Վերահսկիչ պալատի՝ 2015թ. հաշվետվության ժամանակ ՀԱԿ պատգամավոր Հրանտ Բագրատյանը հարց ուղղեց ՎՊ պետի տեղակալ Արա Նռանյանին՝ նշելով. «Մանր-մունր բաներ եք ներկայացնում, նման տպավորություն է ստեղծվում: Հսկայական գումարներ ուղղակի կորում են: Ես ուզում եմ խոսել Հյուսիս-Հարավ ճանապարհի մասին: Այդ ծրագրի իրականացման համար տրամադրվել է արդեն մեկ մլրդ ԱՄՆ դոլարի վարկ, Երեւանի շրջանցման համար էլ՝ մի քանի միլիոն դոլար: Հիմա պատրաստի են այս ճանապարհի այն հատվածները, որոնք նախկինում էլ վատ չեն եղել: Ի՞նչ է այնտեղ կատարվում ընդհանրապես: Հինգ հարյուր միլիոն ԱՄՆ դոլարով դա վերից վար պիտի կառուցվեր, սակայն արդեն միլիարդի է հասնում գումարը: Մեզ շտապ պետք է հասկանալ՝ ի՞նչ է այդտեղ կատարվում»: Նրա հաջորդ հարցը վերաբերում էր մաքսային ծառայություններին. «Ուսումնասիրելով մյուս երկրների փորձը՝ հասկացել ենք, որ ՀՀ-ն միակն է ու վայրենին, որ ինչ ապրանք բերում ես, մաքսային ծառայությունում ասում են՝ այդ ապրանքի գինը սա է ու կապ չունի, թե ինչ արժե քո ապրանքը: Պետք է ճիշտ դատողություն կազմել մաքսային ծառայությունների իրական գների մասին եւ այստեղ, կարծում եմ, ՎՊ-ն անելիք ունի»: Պարոն Բագրատյանն անդրադարձավ նաեւ էներգետիկ դաշտին. «Սակագները ՀԾԿՀ-ն է սահմանում: Ուզում եմ ասել, որ ապշեցուցիչ տարբերություններ կան մյուս երկրների հետ համեմատությամբ: Դուք իրավասո՞ւ եք ստուգելու՝ հանձնաժողովն ինչպե՞ս է այդ գները կազմում»: Պատգամավորի մյուս հարցը վերաբերում էր բանկերին. «Բանկերն անշարժ գույքն էժան վերցնում են որպես գրավ: Այդ պայմաններում անիմաստ է շինարարություն անելը, դրա համար այն կանգ է առել: Ուզում եմ հասկանալ՝ ի՞նչ մեթոդաբանությամբ են բանկերը գրավ վերցնում: Երբ ընդդիմությունը դիտողություն է անում, մեզ հաշվի չեն առնում»: Արա Նռանյանն ասաց, որ նոր Սահմանադրությամբ ՎՊ-ն 2018թ. ինքն է կազմելու իր ծրագիրը եւ որոշելու, թե որ ոլորտներում է ուսումնասիրություն կատարելու. «Այդ ժամանակ կարող ենք անդրադառնալ Հյուսիս-հարավ ճանապարհահատվածին: Ինչ վերաբերում է բանկային համակարգին, ապա ՎՊ դիրքորոշումը միանշանակ է՝ բանկային համակարգը հաշվեքննության պետք է ենթարկվի: Այո, մենք այդ խնդիրներով պետք է զբաղվենք»: Մինչ Հրանտ Բագրատյանն իր վրդովմունքն էր հայտնում Արա Նռանյանի պատասխանի վերաբերյալ, որ Հյուսիս-հարավ ճանապարհին հիմա չեն կարող անդրադառնալ, ՎՊ պետի տեղակալին օգնության հասավ նրա կուսակից, ԱԺ Ֆինանսավարկային եւ բյուջետային հարցերի մշտական հանձնաժողովի փոխնախագահ Աղվան Վարդանյանը: Հրանտ Բագրատյանին սա դուր չեկավ. «Ես չեմ ուզում ձեզ պատասխանել, պարոն Վարդանյան, դա ձեր գործը չէ, ի՞նչ է եղել ձեզ հետ, մի միջամտի»:
