Բազմաթիվ մոմեր՝ դեպի Եռաբլուր (տեսանյութ)
Բյուրավոր մոմեր՝ ի հիշատակ ապրիլի 1-ից ղարաբաղա-ադրբեջանական շփման գծում Ադրբեջանի կողմից սանձազերծված մարտական գործողությունների արդյունքում զոհված տղաների:
Երիտասարդից մինչև տարեց. մարդկանց հոծ բազմությունը հավաքվել էր Շահումյանի հրապարակում: Ժամը 19.00-ից հետո սկսվեց լռության երթը: «Գնում ենք հարգելու մեր անմեղ զոհերի հիշատակը: Մենք պետք է միասնական լինենք»,- նշում էին երթի մասնակիցները: «Ցավալի է, որ մեր հասարակության մի մասն անտարբեր է այս իրավիճակին: Մենք միասնաբար պետք է միջազգային հանրությանը կոչ անենք՝ ճանաչելու ԼՂՀ անկախությունը»,-շեշտեց Արփինե Ստեփանյանը:
Իսկ պատկառելի տարիքի մի կին՝ Նազիկ Զաքյանը, նշեց, որ իր երկու որդիներն էլ ծառայել են բանակում: Հիմա չորս թոռ ունի, որոնք էլ դեռ պետք է ծառայեն. «Խոսքեր չեմ գտնում մխիթարանքի խոսքեր ասելու զոհվածների մայրերին: Ես Եղեռնից մազապուրծ ընտանիքի երրորդ սերունդն եմ: Թուրքն ու ադրբեջանցին նույնն են: Նրանք մարդկային լեզու չեն հասկանում ու մարդ կոչվելուց հեռու են»:
