«Մեկ էլ տեսա՝ իմ տան տեղում էլիտար շենք է». Հյուսիսային պողոտայի նախկին բնակիչ (տեսանյութ)
Հյուսիսային պողոտայի նախկին բնակիչները 11 տարի է՝ պայքարում են պետական կարիքների համար օտարված բնակարանների դիմաց ամբողջական գումար ստանալու համար: «Մեզ տվեցին չնչին գումարներ ու շպրտեցին դուրս: Կողքի հարևանին ծեծեցին, ընտանիքով բոլորը վախեցան, դուրս եկան տներից: Հյուսիսային պողոտայի բոլոր բնակիչները չնչին գումարով շպրտվել են»,-«Ա1+»-ի հետ զրույցում նշեց Լալայանց 29 հասցեի նախկին բնակիչ Գոհար Ասատրյանը: Ասում է՝ նախկինում, երբ գնում էին քաղաքապետարան, կանչում էին իրենց, սեղանի շուրջ խոսում էին խնդրի վերաբերյալ: «Իսկ հիմա իջնում են ներքև, ասում են՝ ձեր հարցը փակված ա: Ո՞նց ա փակված»:
2008 թվականին թվով յոթ բնակչի գումար է տրամադրվել: «Ինձ կոնկրետ տվել են 25.000 դոլար՝ այն ժամանակ դոլարի 317 կուրսով: Բայց պետք է տային 2004-ի՝ 566-ի կուրսով: Ստիպեցին, որ ստորագրեմ այդ գումարի տակ ու միտինգի չմասնակցեմ: Եթե ճիշտ ձևով տային, դա կկազմեր 39.700 դոլար: Ես գնացի բանկից այդ փողը ստացա, տեսա, որ էլի խաբվեցի: Գնացի նորից միտինգի: Այն ժամանակ Զախարյանն էր Քաղաքաշինության նախարարը: Նրա տեղակալ Դավթյան Կարենը եկավ, ասաց՝ դուք ինչի՞ եք կանգնել: Ասացի, որովհետև պակաս եք տվել գումար, տվեք այդ տարբերությունը»:
Տիկին Գոհարը՝ մյուս բնակիչների հետ շարունակելու է պայքարել: Նա մի բացատրություն է տեսնում ստեղծված իրավիճակին. «Իրենց գրպաններն են լցրել մեր գումարները: Մեր գումարներով քաղաքում շատ շինություններ են սարքել, էլիտար շենքեր են կառուցել: ԾԻԳ-ի աշխատողին ես հարցրի, թե ինչո՞ւ եք այդքան չնչին գումար մեզ տալիս, ասաց՝ որովհետև էլիտար շենք չենք կանգնեցնում, օբյեկտ ենք սարքում: Խաբեցին, մեկ էլ տեսա՝ իմ տան տեղում էլիտար շենքը կանգնած է»:
Կենտրոնի նախկին բնակիչն այժմ ծայրամասում վարձով է բնակվում: Նա այս խնդրով հատկապես մեղադրում է Քաղաքաշինության նախկին նախարարին: «Երվանդ Զախարյանը հեռուստատեսությամբ մի քանի անգամ ասել է՝ մենք Հյուսիսային պողոտայի բնակիչներին մեկ քառ. մետրի դիմաց տվել ենք 1000 դոլար: Դա որ լսեցինք, դուրս եկանք պայքարելու»:
Ասում է՝ քաղաքի սիրտն են քանդել և ինչո՞ւ պետք է ինքը հիմա կենտրոնից հեռու գնա:
