Գագիկ Ծառուկյանի մասին ոչ մի հայտարարություն ընթացք չի ստանում
Քաղաքագետ Ստյոպա Սաֆարյանը չի հավատում, որ Աբովյանի նախկին քաղաքապետ Կարո Իսրայելյանի՝ Գագիկ Ծառուկյանի հետ կապված հայտարարությունը ընթացք կստանա։ Կարո Իսրայելյանը Գագիկ Ծառուկյանին համարում է մաֆիայի պարագլուխ եւ պատրաստվում է դիմել դատարան։ «Կարո Իսրայելյանից ավելի աղմկոտ հայտարարություն արել է Սերժ Սարգսյանը, շատ ավելի աղմկոտ, որ Գագիկ Ծառուկյանը առնչվում է կազմակերպված հանցագործություններին, հարկեր չի վճարում։ Եթե Սերժ Սարգսյանի հայտարարությունը ընթացք չի ստանում, Կարո Իսրայելյանինը կստանա՞»,- հարց է տալիս նա։ Ստյոպա Սաֆարյանը զարմանում է այն մարդկանց վրա, ովքեր Գագիկ Ծառուկյանին համարում են ընդդիմադիր. «Երբ Սերժ Սարգսյանը Գագիկ Ծառուկյանին ինչ- որ բան է վճարում, քաղաքականությունից դուրս գալու դիմաց, պետք է հասկանանք, որ վճարը վերաբերում էր Կոտայքի մարզում եւ այլուր Գագիկ Ծառուկյանի դիրքերի ուժեղացմանը»,- ասում է քաղաքագետ Ստյոպա Սաֆարյանը։ Ի դեպ, նա չի զարմանա, եթե Հովիկ Աբրահամյանը հետագայում պաշտոնանկ լինի, եւ նրան համարեն ընդդիմադիր։
