Զանգեզուրի պղնձամոլիբդենայինը չի տուգանվել. պարզաբանում
«Հաշվի առնելով հասարակության հետաքրքրությունը՝պարզաբանում ենք, որ երեկ Ազգային ժողովում ՀՀ ֆինանսների նախարար Գագիկ Խաչատրյանի կողմից «Զանգեզուրի պղնձամոլիբդենային կոմբինատի» գործունեության վերաբերյալ «տուգանք» ձևակերպումը չի օգտագործվել»,- անդրադառնալով որոշ ԶԼՄ հրապարակումների՝ պարզաբանում է «Զանգեզուրի պղնձամոլիբդենային կոմբինատ» ՓԲԸ-ն: Մի շարք ԶԼՄ-ներում ԶՊՄԿ-ին տուգանելու մասին հրապարակումները թյուրըմբռնման արդյունք են. ասվում է հաղորդագրության մեջ.«Իրականում, «Զանգեզուրի պղնձամոլիբդենային կոմբինատի» նոր ղեկավարությունը, խոշոր հարկ վճարողների հարկային տեսչության մասնագետների հետ քննարկումներից հետո վերանայել և ներկայացրել է հարկային ճշգրտված հաշվետվություններ, որի արդյունքում 2012-2013թթ. գործունեության հետևանքով ստանձնել է լրացուցիչ հարկային պարտավորություն: ԶՊՄԿ-ն միշտ գործել է հարկային դաշտում և երբեք չի ուշացրել հարկային վճարումները»: Հիշեցնենք, լուրեր էին տարածվել, թե ՀՀ պետեկամուտների կոմիտեն Զանգեզուրի պղնձամոլիբդենային կոմբինատին տուգանել է 16 միլիարդ դրամով։
