Ինչ թանկացումներ են եղել փոխարժեքի տատանումից (տեսանյութ)
Կառավարության նիստի մեկնարկին այսօր վարչապետ Հովիկ Աբրահամյանը հանձնարարեց Տնտեսական մրցակցության պաշտպանության պետական հանձնաժողովի նախագահ Արտակ Շաբոյանին ներկայացնել, թե գների ինչ բարձրացում է նկատվել ապրանքատեսակների շուկայում: Պարոն Շաբոյանը նշեց, որ փոխարժեքի արժեզրկումը ուղղակի ազդեցություն է ունեցել ներմուծված ապրանքների գների վրա, որոշ չափով նաև տեղական արտադրության շուկայի վրա. «Մենք ուսումնասիրություն արել ենք 16 ապրանքատեսակի համար: Մասնավորապես կաթնամթերքի ոլորտում կա գների բարձրացում: Փոխարժեքի տատանումը իր ազդեցությունը կարող է թողնել կաթնամթերքի վրա, քանի որ որոշ բաղադրիչներ կաթնամթերքի արտադրման համար ներմուծվում են դրսից, ու դա կարող է ունենալ ազդեցություն գնի վրա»: Նա նշեց, որ ապրանքների գների բարձրացումը տատանվում է 2-13 տոկոսի միջակայքում, իսկ ամենօրյա կտրվածքով դիտարկումները շարունակելու են իրականացնել: Վարչապետը ճշտեց` ներկայում չկա՞ն չարաշահումներ: «Այս պահին մեծ հաշվով փոխարժեքի հետ համահունչ են գների բարձրացումները, և մեր ուսումնասիրությունները ավարտելուց հետո վերջնական կներկայացնենք»,-պատասխանեց Արտակ Շաբոյանը:
