Սարիթաղցիներն ամեն օր վտանգում են իրենց կյանքը (տեսանյութ)
Սարի թաղի բնակիչներն ամեն օր աշխատանքի, դպրոց կամ տուն հասնելու համար փորձությունների միջով են անցնում՝ ընդհուպ վտանգում իրենց կյանքը։
Մովսես Խորենացի փողոցում հետիոտնի համար գծանշան է նախատեսված, սակայն հետքն անգամ չի երեւում։ Վերջին անգամ բնակիչները գծանշանը տեսել են մեկ տարի առաջ։
«Անձրեւին, ցեխին եկան գծեցին, հետո մաքրվեց գնաց»,-ասաց Սարի թաղի բնակիչ Հենրիկ Բարսեղյանը։
«Սպասում են` մի վտանգավոր բան լինի, նոր ներկեն»,-բորբոքված նշեց մեկ այլ բնակիչ Հենրիկ Համբարձումյանը։
Վերջինս արդեն մեկ տարի է` դիմում է բոլոր հնարավոր մարմիններին ՝ գծանշանները վերականգնելու համար, սակայն ապարդյուն. «Մեկը մեկի վրա է գցում»։
Վարորդները նույնպես դժգոհ են։ Ճանապարհի այդ հատվածում ոչ միայն գծանշաններ չկան, այլեւ չի երեւում նաեւ հետիոտնի ճանապարհի մասին հուշող նշանը։ Այն հայտնվել է ծառերի հետեւում։
Ի դեպ, գծանշաններով զբաղվում է ոստիկանությունը, որտեղից մեզ հայտնեցին, որ Խորենացի փողոցի այդ հատվածում իսկապես գծանշան նախատեսված է եւ առաջիկայում այն կթարմացնեն։
