Ուկրաինայի Մարիուպոլ քաղաքում կան զոհեր
Ամերիկայի ձայն Ուկրաինայի անվտանգության ուժերն ուրբաթ օրը ոչնչացրել են ռուսաստանամետ մոտ 20 զինյալ, որոնք գրոհել էին երկրի արևելյան Մարիուպոլ նավահանգստային քաղաքի ոստիկանության շենքը՝ փորձելով վերահսկողություն հաստատել դրա նկատմամբ: Երկրի ներքին գործերի նախարար Արսեն Ավակովի համաձայն, «ահաբեկիչները» գրոհել են Մարիուպոլի ոստիկանության շենքը, որի ներսում մարտեր են ծավալվել: Ավակովի համաձայն, մարտից հետո ռուսաստանամետ զինյալները լքել են Մարիուպոլի ոստիկանության շենքը՝ ապաստան որոնելով քաղաքում: Տեղի ոստիկանությունը հրաժարվել է որևէ մեկնաբանություններ ներկայացնել։ Ուկրաինայի անվտանգության ուժերն ավելի վաղ մի քանի զրահամեքենա էին տեղափոխել քաղաք: Մարիուպոլ քաղաքում արդեն մի քանի օր շարունակվում են բախումներն Ուկրաինայի ոստիկանության և ռուսաստանամետ անջատողականների միջև: Ռուսաստանի նախագահ Վլադիմիր Պուտինն այս ընթացքում ժամանել է Ուկրաինայից բռնակցված Ղրիմում գտնվող Սևաստոպոլ քաղաք: Ռուսաստանի նախագահը Սևաստոպոլում կայցելի ռազմական շքերթ, ինչպես նաև Հաղթանակի օրվան նվիրված այլ միջոցառումներ: Սա Ռուսաստանի նախագահի առաջին այցն է նավահանգստային այս քաղաք, որն այս տարի ավելի վաղ բռնակցվել է Ռուսաստանի կողմից: Նախագահ Պուտինն ուրբաթ ավելի վաղ դիտել էր երկրի մայրաքաղաք Մոսկվայում Հաղթանակի օրվա կապակցությամբ անցկացված ռազմական շքերթը: Շքերթին մասնակցել է Ռուսաստանի զինված ուժերի 11 հազար զինծառայող:
