Ուշադրություն. երթեւեկության փոփոխություն
Ճանապարհային ոստիկանությունը տեղեկացնում է, որ 2014 թ. մարտի 25-ից փոփոխվելու է երթևեկության կազմակերպումը Երևան քաղաքի Տիգրան Մեծ պողոտա, Մովսես Խորենացի և Երվանդ Քոչար փողոցների խաչմերուկում: 1. Տիգրան Մեծ պողոտայում նախկին հետիոտնային անցման մոտից (հետիոտնային անցումը փոխարինվել է վերգետնյա անցումով) երթևեկության մասնակիցների համար նախատեսված լուսացույցերը մոտեցվելու են Մ. Խորենացի, Ե. Քոչար փողոցների և Տիգրան Մեծ պողոտայի խաչմերուկին՝ թույլ տալով տրանսպորտային միջոցներին երթևեկել ուղիղ՝ դեպի Հանրապետության հրապարակ և աջ՝ դեպի Ե. Քոչարի փողոց: 2. Մ. Խորենացի, Ե. Քոչար փողոցների և Տիգրան Մեծ պողոտայի խաչմերուկում, Տիգրան Մեծ պողոտայով դեպի երկաթգծի կայարան տանող ճանապարհահատվածի երեք երթևեկելի գոտիների փոխարեն գործելու է չորս երթևեկելի գոտի: 3. Տիգրան Մեծ պողոտայով դեպի երկաթգծի կայարան տանող ճանապարհահատվածի լուսացույցերը մնալու են նույն տեղում հետիոտնի համար: Նույն ուղղությամբ նոր ձևավորվող խաչմերուկում ավելացվելու է ևս մեկ լուսացույց: 4. Նոր ձևավորվող խաչմերուկում երթևեկությունը կազմակերպվելու է հետևյալ ձևով. ա) երթևեկությունը թույլատրող լուսացույցի կանաչ լույսի առկայության դեպքում 3-րդ և 4-րդ շարքերից երթևեկությունը թույլատրվելու է ձախ՝ դեպի Երվանդ Քոչար և Մովսես Խորենացի փողոցներ, իսկ 1-ին և 2-րդ երթևեկելի գոտիներից՝ միայն ուղիղ, ընդ որում` լուսացույցն 1-ին երթևեկելի գոտու համար միշտ բաց է: բ) Ագանթագեղոս փողոցի կողմից Մ. Խորենացու փողոցով երթևեկող տրանսպորտային միջոցները երթևեկելու են միայն աջ՝ դեպի երկաթգծի կայարան, իսկ Նար Դոս փողոցի կողմից Մ. Խորենացու փողոցով երթևեկող տրանսպորտային միջոցները խաչմերուկից երթևեկելու են միայն աջ: Ճանապարհային ոստիկանություն
