ԱՄՆ պաշտոնյաներին չեն անհանգստացրել ՌԴ պատժամիջոցները
Միացյալ Նահանգների պաշտոնյաներն ու օրենսդիրները լուրջ չեն ընդունել Ռուսաստան մուտքի արգելքն ու պատասխան այլ միջոցները, որոնք Ռուսաստանի իշխանություններն ընդունել են՝ ԱՄՆ-ի նախագահ Բարաք Օբամայի կողմից Ռուսաստանի նկատմամբ ավելի խիստ պատժամիջոցների սահմանմանն ի պատասխան: Ռուսաստան մուտքն այսուհետև արգելված է ԱՄՆ-ի վեց օրենսդիրների և ԱՄՆ-ի վարչակազմի երեք պաշտոնյայի համար: Այս պաշտոնյաներից մեկը ԱՄՆ-ի Ներկայացուցիչների պալատի խոսնակ, հանրապետական Ջոն Բեյներն է, որի ներկայացուցիչը հինգշաբթի օրը հանդես է եկել հայտարարությամբ, որի համաձայն խոսնակին «չի տխրեցրել տեղի ունեցածը»: «Խոսնակը հպարտանում է այն հանգամանքով, որ իրեն ներառել են Պուտինի ագրեսիային դիմակայելու պատրաստ անձանց ցուցակում», - ասել է Ջոն Բեյների ներկայացուցիչը: Նման մեկնաբանություններով հանդես է եկել ԱՄՆ-ի Սենատի արտաքին հարաբերությունների հանձնաժողովի նախագահ Ռոբերտ Մենենդեսը: «Եթե, կանգնելով ի պաշտպանություն Ուկրաինայի ժողովրդին, նրա ազատությանը, մեծ ջանքերի շնորհիվ ձեռք բերված ժողովրդավարությանը և երկրի ինքնիշխանությանը, ես ենթարկվել եմ պատժամիջոցների, ապա թող այդպես լինի», - ասել է սենատոր Մենենդեսը: Ռուսաստանը պատժամիջոցների ենթարկված անձանց ցանկում ներառել է նաև հանրապետական սենատոր Ջոն ՄըքՔեյնին, որը հայտարարել է, որ չի դադարեցնի պայքարը հանուն Ուկրաինայի, այդ թվում՝ Ղրիմի, ժողովրդավարության և անկախության: Ռուսաստանի կողմից ընդունված պատժամիջոցների ցանկում սակայն չի ներառված ԱՄՆ-ի արտգործնախարարության որևէ աշխատող: «Այն, ինչ մենք տեսնում ենք մինչև հիմա՝ ցուցակում ներառված անձինք հպարտանում են դրանում ներառված լինելով: Հպարտանում են նրանով, որ սատարել են այն, ինչ ճիշտ են համարել», ասել է ԱՄՆ-ի արտգործնախարարության խոսնակ Ջեն Փսակին՝ ներկայացնելով Ռուսաստանի պատժամիջոցների վերաբերյալ ԱՄՆ-ի վարչակազմի դիրքորոշումը: Ամերիկայի ձայն
