Ակտիվիստներին դիմավորեց ոստիկանական պատը
Մի խումբ հասարակական ակտիվիստներ «Խաղաղություն ժողովուրդներին, պատերազմ իշխանություններին» խորագրով ակցիայի շրջանակներում ՌԴ դեսպանատան մոտից երթով շարժվեցին դեպի ոստիկանության Կենտրոնի բաժին, ուր ավելի վաղ բերման էր ենթարկվել ակցիայի 4 մասնակից։
Ակցիայի մասնակիցներին դիմավորեց ոստիկանական պատը եւ թույլ չտվեց առաջանալ ու մոտենալ ոստիկանության շենքին։ Ակցիայի մասնակիցներն ընդամենը 10-15 հոգի են, մինչդեռ ոստիկանական խմբերը՝ կրկնակի-եռակի։
Առաջին բերման ենթարկվածին՝ Տիգրան Պարսիլյանին հենց նոր բաց թողեցին։ Նա պատմեց, որ իր նկատմամբ առաջադրվել է քրօրի 182 հոդվածը՝ ոստիկանի օրինական պահանջը չկատարելը, որը ենթադրում է աշխատավարձի 50-ապատիկի չափ տուգանք։ Տիգրանը պատմեց, որ ոչ մի փաստաթղթի տակ չի ստորագրել, իրեն խուզարկել են եւ պատրաստվում է իր նկատմամբ առաջադրված մեղադրանքը դատական կարգով վիճարկել։
