Ատոմակայանի աշխատակիցները միացել են ԴԵՄ-ին
Մեծամորի ատոմակայանի աշխատակիցները նույնպես դեմ են պարտադիր կուտակային կենսաթոշակային համակարգին։ Նրանք այսօր հավաքվել էին ատոմակայանի դիմաց քննարկելու, թե ինչպես կարող են միանալ ու իրենց բողոքի ձայնը բարձրացնել։ «Մենք մի քանի օր առաջ իմացանք, որ մեր տնօրինությանը ստիպել են, որ մեր աշխատավարձերից պահումներ անեն։ Մենք դա հանդուրժել չենք կարող»,- «Ա1+»-ի հետ հեռախոսազրույցում ասաց ատոմակայանի աշխատակիցներից մեկը։ Հավաքված աշխատակիցները որոշել են նաեւ ստորագրահավաք անել ու ներկայացնել ընդհուպ մինչեւ Սահմանադրական դատարան։ Ի դեպ, այսօր Աշխատանքի և սոցիալական հարցերի նախարար Արտեմ Ասատրյանն ԱԺ-ում ասել է, որ ՍԴ որոշումը հստակ ամրագրել է երկու խնդիր՝ պարտադիր կուտակային վճարները չկատարելու դեպքում սանկցիաներ չեն կիրառվում և երկրորդ՝ աշխատակիցներն իրավունք ունեն այս ընթացքում չընտրել ֆոնդեր. «Մնացած դրույթները, որոնք ուժի մեջ են, ենթադրում են պարտադիր կուտակային վճարների կատարում այն գործատուների կողմից, ովքեր իրենց պարտավորությունները չեն կատարում զուտ սանցկիաներ լինելու հանգամանքով, այլ իրականացնում են օրենքով սահմանված պարտավորություններ»։
