Արթուր Աբրահամը 38-րդ հաղթամակը տարավ
Գերմիջին քաշային կարգում աշխարհի նախկին չեմպիոն, Գերմանիան ներկայացնող հայազգի բռնցքամարտիկ Արթուր Աբրահամը 38-րդ հաղթամակը տարավ պրոֆեսիոնալ ռինգում:
Երեկ կեսգիշերից հետո գերմանական Օլդենբուրգ քաղաքում կայացած մենամարտում մեր հայրենակիցը վստահ առավելության հասավ 29-ամյա իտալացի բռնցքամարտիկ Ջովանի դե Կարոլիսի նկատմամբ, չնայած հարկ եղավ անցկացնել բոլոր 12 ռաունդները: Եզրային երեք մրցավարներն էլ հաղթանակ շնորհեցին Արթուր Աբրահամին` 120:108, 119:109, 119:109:
Մրցամարտի 6-րդ եւ 8-րդ ռաունդներում աշխարհի նախկին չեմպիոնը կարող էր նոկաուտով հաղել, սակայն իտալացուն հաջողվեց խուսափել այդ տհաճ պահից: Հետագայում Ջովանի դե Կարոլիսը հիմնականում փախչում էր Արթուր Աբրահամի հարվածներից:
Հաջորդ մարտը մեր հայրենակիցը կանցկացնի 2014 թվականին, աշխարհի ներկայիս չեմպիոն, գերմանացի Ռոբերտ Շտիգլիցի հետ: Արթուր Աբրահամը հաղթել է նրա հետ անցկացրած առաջին մենամարտում, իսկ ռեւանշի ժամանակ պարտվել է եւ զիջել չեմպիոնական տիտղոսը:
