«Միկան» հաղթանակով սկսեց խաղարկությունը
Երեւանի «Միկա» շախմատի կանանց թիմը հաղթանակով սկսեց ելույթները Հունաստանում մեկնարկած Եվրոպայի ակումբների գավաթի խաղարկությունում:
Առաջին տուրում մեր թիմը 3:1 հաշվով վստահ հաղթեց Վիլնյուսի ՄՐՈՒ-ին: Առաջին երկու խաղատախտակներին հանդես եկող հնդկուհի Հարիկա Դրոնավալին եւ Լիլիթ Մկրտչյանը ոչ-ոքի խաղացին, իսկ ահա մեր մյուս երկու շախմատիստուհիները` Էլինա Դանիելյանը եւ վրացուհի Լելա Ջավախաշվիլին հաղթեցին իրենց մրցակիցներին:
Այսօր նախատեսված երկրորդ տուրում «Միկան» ուժերը կչափի Մոնակոյի «Սերկլ Էչես» թիմի հետ, որն առաջին մրցախաղում 4:0 հաշվով հաղթանակ է տարել:
Հայաստանի տղամարդկանց հավաքականի անդամ Սերգեյ Մովսիսյանը ռուսական «Սանկտ Պետերբուրգ» թիմի կազմում նույնպես մասնակցում է խաղարկությանը: Առաջին տուրում նա հաղթանակ տարավ եւ օգնեց իր թիմին 5,5:0,5 հաշվով ջախջախել անգլիական «Բարբիքենին»:
Երկրորդ տուրում «Սանկտ Պետերբուրգը» կմրցի շվեյցարական «Ժնեւի» հետ:
