Հաղթեց Ռոբերտ Հովհաննիսյանը
Հայաստանը շախմատիստ, գրոսմայստեր Ռոբերտ Հովհաննիսյանի հաղթանակով ավարտվեց Ջերմուկում անցկացված շախմատի Կարեն Ասրյանի 6-րդ հուշամրցաշարը:
Նա 9 հնարավորից վաստակեց 7,5 միավոր եւ միանձնյա գլխավորեց աղյուսակը: Մրցանակային 2-րդ տեղը զբաղեցրեց մեր գրոսմայստեր Սամվել Տեր-Սահակյանը, որը նույնպես պարտություն չկրեց, սակայն վաստակեց 6,5 միավոր: Հուշամրցաշարում երրորդ ճանաչվեց երիտասարդ գրոսմայստեր Հովհաննես Գաբուզյանը, որը միայն լրացուցիչ գործակիցներով առաջ անցավ բելառուսցի Անդրեյ Գորովեցից:
Կանանցից լավագույն արդյունք ցույց տվեց 14-ամյա ղազախստանցի շախմատիստուհի Ժանսայա Աբդումալիկը, որը տղամարդկանց հետ պայքարում վաստակեց 5,5 միավոր եւ զբաղեցրեց 16-րդ տեղը: Մեր գրոսմայստեր Լիլիթ Մկրտչյանը 5 միավորով հանգրվանեց 21-րդ հորիզոնականում:
Հիշեցնենք, որ Կարեն Ասրյանի 6-րդ հուշամրցաշարին մասնակցեցին 9 երկրների 55 ներկայացուցիչ:
