Առաջինը՝ թիմային հաշվարկով
Հայաստանի սուսերամարտիկները թիմային հաշվարկով 1-ին տեղն են գրավել Վլադիկավկազում ավարտված Գաջիեւի անվան միջազգային հուշամրցաշարում:
Ինչպես տեղեկացնում է ՀՀ սպորտի եւ երիտասարդության հարցերի նախարարության մամուլի ծառայությունը, մրցաշարին մասնակցել են ՌԴ, Ադրբեջանի, Հայաստանի եւ Վրաստանի պատանի սուսերամարտիկները: Մերոնք ներկայացել են 6 մարզիկով:
Ճկասուսերակիրների մրցումներում հաղթել է Երեւանի հրաձգության եւ սուսերամարտի մանկապատանեկան մարզադպրոցի սան Մայքլ Հովհաննիսյանը, իսկ Արաբկիրի սուսերամարտի մարզադպրոցի սան Էմիլ Դանիելյանը զբաղեցրել է 3-րդ տեղը:
Այսօր Նորագավիթի սուսերամարտի մարզադպրոցում մեկնարկեց սուսերամարտի ՀՀ մեծահասակների առաջնությունը: Դրան մասնակցում են Երեւանի, Գյումրիի, Բյուրեղավանի, Վանաձորի ուժեղագույն սուսերամարտիկները: Առաջնությունը կավարտվի մայիսի 19-ին:
Մրցաշարի ընթացքում կորոշվի Զագրեբում կայանալիք Եվրոպայի մեծահասակների առաջնության մասնակիցը:
